Frávísunarkröfu vísað frá?

Hvernig er eiginlega hægt að vísa frávísunarkröfu frá? Hvernig virkar frávísuð frávísunarkrafa? Frávísuð frávísun? Hvað er eiginlega hægt að frávísa frávísun oft? Er hægt að frávísa frávísun frá frávísun um frávísun? Held ég hafi þetta ekki lengra að sinni. Skil hvorki upp né niður í þessu.

Frávísunarkröfu vísað frá

Uppreisn æru!

Jæja, þá hafiði það gott fólk. "Að nenna ekki að raka sig" er það sem gildir. Uppreisn æru fyrir Tuðarann.! Gillett hefur ekki grætt nema rétt undir fárækramörkum á Tuðaranum gegnum árin. Betri helmingurinn kallar það reyndar leti að misþyrma ekki viðkvæmri húðinni með "Túrbófimmblaðasköfum" hvern morgun, og lætur að því liggja að loðinn kjammi jaðri við vera skítugur, þegar Tuðarakvikyndið hefur ekki nennt að skafa broddana framan úr bjánafésinu í  einhverja daga. Sjálfum finnst Tuðaranum best að vera svolítið villtur í framan, en að hafa mynd af Pittinum sem undirstrikun fyrir fullyrðingunni um að órakaðir karlar séu svona frekar meira aðlaðandi en andlitsskeindir, finnst Tuðaranum frekar grunnt. Þó Tuðarinn skafi ekki framan úr sér á hverjum degi, mun sennilega fyrr frjósa í Helvíti, en að hann nái nokkurn tíma "lookinu" hans Brads. Reyndar útleggst nafnið Brad sem Brattur á íslensku og guttinn sá ( Þessi íslenski) er vel "broddaður" um kjammana,(allavega síðast er ég sá hann) og hvers manns og konu hugljúfi. Við letingjar sem nennum ekki andlitssköfun nema þegar okkur hentar, erum bara nokkuð sáttir við að vera taldir svolítið "hönk" (ekki spotti) og hvetjum alla sem leiðist daglegur rakstur að reyna nú einu sinni eitthvað nýtt. Til dæmis  með rakstur annan hvern dag og síðan þriðja og síðan fjórða o.svo fr.vegis þar til komið er gott "Look".  Er viss um að Brad og Brattur eru mér sammála. 

Skeggbroddar leiðin til að vinna hjarta konunnar

Réttu mér róuna!

"Réttu mér róuna, ég pant ára."

Þessi setning hefur vafist fyrir mörgum manninum/konunni, gegnum tíðina. Hvort árar maður/kona með róunni, eða róar með árunni? Hrönn vinkona mín á Selfossi sem á fleiri hlaupaskó en hafa verið fundnir upp, "so far" velti þessu gríðarlega mikla spursmáli fyrir sér nýlega. Ég hef svosem engin svör "á reiðum höndum"(Brattur...your turn) en tel að sá sem rær, eigi í flestöllum tilfellum að ráða lendingarstað.

Brattur.....C að þú ert enn Crstaklega aktivur.

Hilsen ,

Ctuðarinn.

 

Íslenskur aumingjaskapur.

Tvær krónur! Eigum við kaupendur að hoppa hæð okkar af gleði vegna þess? Hvern fjárann skipta tvær krónur okkur til lækkunar, þegar við höfum verið tekin í hinn endann, ósmurt með hundrað kalli, undanfarnar vikur? Það standa ennþá ansi margar krónur stíflaðar í ónefndum enda sem illa horfir með að losni  um á næstunni.

 Tölvupóstur gengur manna og kvenna í millum þessa dagana, þar sem VIÐ erum hvött til að sniðganga ákveðin SAMRÁÐSFÉLÖG í olíu og bensínbransanum vegna óheyrilega hás eldsneytisverðs. Hvað gerist? .....Ekkert! ...........Áfram halda "löghlýðnir" viðskiptavinir að versla við Samráðið og svo skilur fólk ekkert í því að verðið haldi áfram að hækka! Íslendingar eiga skilið hátt eldsneytisverð. Við erum ekki einu sinni fólk til að mótmæla! Þetta er dæmigerður íslenskur aumingjaskapur! Íslendingar eru verstu mótmælendur í heimi og það nýta sér bæði innlendir sem erlendir auðhringar, olíufurstar, álrisar og innlendir "draumaprinsar" í verðbréfageiranum.. Strauja hér yfir menn og náttúru og hljóta til þess fulltingis Alþingis. Alþingis, þar sem eitt sinn riðu hetjur um velli.

Við erum þegar öllu er á botninn hvolft........okkar eigin verstu óvinir. Hátt eldsneytisverð eigum við skilið eins og aðrar þjóðir því að..............við gerðum EKKI NEITT:

Með tár á vanga.:

Tuðarinn.

 

 

Verð á eldsneyti lækkar um 2 krónur

"GRÍÐARLEGS" sársauka"#$&%#"9&%

"Kona sem slasaðist á auga við að fara í nærbuxur sínar hefur kært nærbuxnaframleiðandann, "Victorias Secret" fyrir að hafa valdið henni GRÍÐARLEGS, sársauka." (Veit að gæsalappirnar eru ekki samkvæmt okkar staðli, en gríðarlegs.......):-(

Ætla ekki að hafa fleiri orð um þessa fréttamennsku og því síður um málfar fréttamannsins sem sennilega á heiðurinn af "snöruninni" yfir á okkar ástkæra mál. Er ekki kominn tími til að ritstjórn Morgunblaðsins ráði til sín skrifandi einstaklinga? Látum vera að engar kröfur séu lengur gerðar til fréttamanna um efnistök, en andskotinn sjálfur, ef ekki er lengur hægt að skrifa fréttir og ekkifréttir betur en í þessari ömurlegu ekkifrétt. Búinn að segja upp Mogganum fyrir nokkru síðan og sé að það var alveg hárrétt ákvörðun. Bæði "ekónómísk" og til að forðast fruss yfir morgunkaffinu. Þvílíkt metnaðarleysi! Þó ekki hafi verið nema þvengur sem um ræddi. Hún fékk jú aðskotahlut í augað blessuð konan. Hver á svosem von á því, á leiðinni í undirföt, þó efnislítil séu?

Nærbuxnaslys kært

Stutt athugasemd.

Þetta eru vitleysingar. Altso yfirvöld í Easton.

Sektaður fyrir að vera ber að ofan

Ábyrgð fjölmiðla.

Það sannast sennilega best þegar atburðir sem jarðskjálftar verða, hve mikilvægt vægi góðrar fréttamennsku er. Fjölmiðlar sem keppast við að gera sem mest úr ástandinu, dæma sig sjálfir, en þeir fjölmiðlar sem greina frá atburðum með hógværð og stillingu, miðla upplýsingum til fórnarlamba hamfaranna og leiðbeina þeim í kaosinu hljóta að standa upp úr flórunni. Tuðaranum finnst sem nánst allir fjölmiðlar hafi kúkað upp á bak í umfjöllin sinni um þennan mikla skjálfta, sem reið yfir í fyrradag. Á það sérstaklega við um viðbrögðin fyrstu mínúturnar og síðan fyrsta klukkutímann eftir að ósköpin dundu yfir. Engu var líkara en að brostin væri á keppni í lífsreynslusögum og nú tveimur dögum síðar virðist ekkert lát á þessu fjandans athyglis og auglýsingaskrumi fréttamiðlanna. Jafnvel lagst svo lágt í keppninni um áhorf að reyna að græta börn í beinni útsendingu, svo selja megi betur "stöðina".  Tuðaranum héldu nánast engin bönd önnur en að reyna að vera eins og maður og einbeita sér að því að hafa sjónvarpsdrusluna innandyra en ekki úti í garði við áhorfið á þessa ömurlegu "on the spot" fréttamennsku. Andskotinn sjálfur hvað mikið ræðst af algerlega óhæfu fólki til að flytja okkur fréttir af atburðum sem þessum. Eru alls engar kröfur lengur gerðar til "fréttamanna" ? Þetta krakkastóð og útbelgda lið sem þráir ekkert meira en athygli sér til handa, með "Séð og Heyrt" kjaftæði og annari opinberri umræðu, er ekki með nokkru móti hæft til fréttaflutnings af atburðum sem þessum. Góð fréttamennska á ekki að vera keppni, en "fréttamennirnir" hafa bara ekki fattað það ennþá. Íslenskir "fréttamenn", skammist ykkkar fyrir ykkar aumkunarverða typpaslag jarðskjálftadagsins, hvort heldur sem þið hafið typpi....eða hitt.

Snarpir eftirskjálftar í kvöld

"Furðuleg" hreinsun.

Það er varla hægt annað en að brosa út í annað yfir "hreinsunarferlinu" í Sundahafnarolíuslyssfréttamannaofurútlistuninni.  600 lítra sletta datt í höfnina og allt ætlar vitlaust að verða! Fyrst er öllu olíugúmmelaðinu dælt á land í þar til gerðar þrær, en meðan menn og konur, já ef ekki mýs líka sofa, rignir aðeins meira en menn og mýs áttu von á og allt gúmmelaðið flýtur til hafs á ný, sem aftur veldur öðru mengunarslysi, sennilega öllu verra, minna en sólarhring síðar og það á enn verri stað en í fyrra skiptið! Er hægt að klúðra "björgunaraðgerðum" öllu meir?

Bara byggja olíuhreinsistöð fyrir vestan!!! Jahú og bara láta vaða! Það þarf jú að redda byggðunum, sama hvað það kostar! Brandari dagsins er algerlega misheppnað "björgunarteymi" þegar olíuslys ber að ströndum. Þvílíkt og annað eins klúður!!!!! Gúmmituðrurnar og blikkandi björgunarsveitarbílarnir sannfærðu mig engan veginn um það að við getum átt við olíuleka af stærðargráðunni milljón lítrar- plús.

Vil að lokum benda á að uppþvottalögur er eitt albesta mótvægi við olíubrák og þekkt "Trix" um allan heim, nema ef vera skyldi hér á landi. Drottinn minn dýri, ég vona að hingað álpist aldrei olúhreinsunarstöð!!!!!!!

 

 

 

 

Olíuhreinsun gengur vel

GLEÐILEGT TUÐARA "TRUKKASUMAR!"

Kæru vinir, allir landsmenn, fæddir hér sem annars staðar, vandamenn, venslamenn, skyldir sem óskyldir og aðrir velunnarar, sem og þeir sem þola mig engan veginn.: Gleðilegt sumar, þó sennilega væri réttara að þakka fyrir veturinn fyrst. Við íslendingar erum jú þekktir fyrir að setja forgangsröðunina eftir "behag". 

Þessi vetur hefur einhvern veginn, eins og reyndar of margir vetur fram að þessu, liðið eins og örskotsstund og enn er blessað sumarið komið á ný, óháð stýrivöxtum eða "stórkostlegum landvinningum hérlendra kaupahéðna eða útrásar"snillinga".

 Með tilheyrandi fuglagargi, krakkaöskrum, blómafnyk, grasfýlu, geitungaplágum, rýrnadi kaupmætti, lækkandi fasteignaverði, minnkandi hagvexti, klikkuðum stýrivöxtum,  brjálæðislegu eldsneytisverði, ennþá meir skuldasöfnun, akkúrat ENGRI eignamyndun útrásar, "gera ekki neitt ríkisstjórn", síbreytilegri borgarstjórn Reykjavíkur, Abbas á Bessastöðum, Baugi í verðlaunasæti útflutningsgreina, 0-0 hjá Manjú og Börsungum, "trukkastandi" við Rauðavatn, misvitrum dramadrottningum í fjölmiðlastétt.................

Þetta verður gott sumar fyrir TUÐARA, ef hann bara nennir..?!

 Spurning hvort svo verður.

Eigiði gott sumar elskurnar mínar allar

Útflutningsverðlaun?????

Það er greinilegt að Tuðarinn hefur lagt einhverja allt aðra meiningu í orðið útflutning en forseti Íslands. Hvarflar að Tuðaranum að verið sé að borga fyrir ferðir með einkþotunni. Undarlegt að stærsti innflytjandi landsins skuli fá "Útflutningsverðlaun". Hvað hefur Baugur flutt úr landi sem er verðlauna virði, annað en einkahagsmuni eigenda? Allt er nú til. Útflutningsverðlaun Forseta Íslands hafa hér með að engu verið gerð og ekki nokkurs virði.

Baugur Group hlýtur Útflutningsverðlaun forseta Íslands