DV

Hvað er það eiginlega sem ávallt virðist loða við þetta blessaða DV sem dagblaðs, morgunblaðs, kjaftablaðs, já eða skítablaðs? Undanfarið hefur blaðið stungið á einu og einu kýli í samfélaginu, sem er vel og verðugt að skoða. Það er hins vegar engu líkara en að ritstjórn DV sé það lífsins ómögulegt að halda höfði og fylgja eftir þeim örfáu málefnum sem þeim ratast á að segja satt og rétt frá. Undarlegt í meira lagi að þeir sem stjórna þessum snepli geti aldrei, að því er virðist, forðast það að drulla upp á bak og jafnvel upp fyrir axlir.  Þetta er ekki fréttamennska. Þetta er fíflagangur og þeir sem kvitta fyrir svona djöfulsins rugl fréttaflutning ættu ekki að koma nálægt blaðamennsku. Er ekki hægt að senda þetta lið eitthvað? Bara eitthvað! DV = Djö....... Vit........ar. Er þetta mótvægið við einokun á fjölmiðlamarkaði? Íslenskir fréttamenn og blaðasnápar hafa sýnt það og sannað undanfarnar vikur að allt of stór hluti þessa fólks, er með öllu óhæft til að sinna fréttamennsku, hvort heldur er á rituðu eða töluðu máli. Ameríska og breska "lookið" virðist hafa heltekið þetta lið og engu líkara en meginþorri þeirra telji takmarkinu náð með því að líkja sem mest eftir því sem gerist í bretlandi (með litlum staf að ráðnum hug) eða ameríkunni. Egóflipp og monolog hafa gert gesti umræðuþátta óþarfa og fréttaflutning ritmiðlanna minna virði en salernispappír. Það er illt í efni á íslenskum fjölmiðlamarkaði, hvort heldur sem um er að ræða eign á honum, eða framsetningu frétta. Bakskitumiðill mánaðarins er án efa DV og nóvember rétt að byrja. Verður fróðlegt að fylgjast með framhaldinu....eða hvað? Held ekki.  

Segir frétt DV uppspuna

"Nóa-Kropp vísitalan"

Það verður ekki sagt um Tuðarann að hann hafi í gegnum árin verið nógu meðvitaður um verðlag á matvöru hér á landi. Sá hluti tilverunnar hefur fram að þessu verið lagður í hendur framkvæmdastjóra heimilisins, enda hún mun séðari í þessum efnum. Kvikyndið hefur reyndar fengið að keyra innkaupakerruna og yfirleitt borga, en þar hefur líka framkvæmdarstjórinn dregið línuna. Ein vara hefur þó verið Tuðaranum hugleikinn um langan tíma, enda eitt af fáu sem hann fær að velja einn og óstuddur, þegar verslað er í Bónus. Þar er um að ræða 400 gramma poka af Nóa-Kroppi sem maulað er með góðri list að lokinni versluninni. Um langa hríð hefur verð á þessu guðdómlega nammi verið 398 krónur í Bónus. Í verslunarferð dagsins kom hins vegar í ljós að verðið er orðið hvorki meira né minna en 458 krónur og lá við að Tuðarakvikyndið bakkað grátandi út á götu aftur. Sextíu kall, bara sí svona. Þetta er tvímælalaust rakið merki um að það eru krísutímar framundan og ljóst að Tuðarinn verður að finna sér eitthvað billegara að maula hér eftir. Getur einhver bent á ódýrara "maulerí" að lokinni verslunarferð? Ef allt annað hækkar í sama hlutfalli og Nóa Kroppið í Bónus, er illt í efni. Það var hundfúll Tuðari sem kjagaði út úr Bónus í dag með matvörur helgarinnar. Sit nú heima og naga "Eigin-Kropp", þ.e. neglur.     

Viðvörun síðan 1802, vegna banka!

Hér að neðan er tilvitnun í orð Thomas Jefferson frá árinu 1802 til þáverandi fjármálaráðherra Bandaríkjanna, Albert Gallatin. Á vel við í dag þó liðin séu 206 ár síðan þetta var ritað.

  

"I believe that banking institutions are more dangerous to our liberties than standing armies. If the American people ever allow private banks to control the issue of their currency, first by inflation, then by deflation, the banks and corporations that will grow up around [the banks] will deprive the people of all property until their children wake-up homeless on the continent their fathers conquered. The issuing power should be taken from the banks and restored to the people, to whom it properly belongs. "

Thomas Jefferson, Letter to the Secretary of the Treasury Albert Gallatin (1802)
3rd president of US (1743 - 1826)

Internasjonalinn á Arnarhóli

Mótmæli og Internasjonalinn á Arnarhóli. Einmitt.... Akkúrat það sem okkur sárvantar i augnablikkinu! Bölvuð endemis og árans della sem fólki dettur í hug. Hefði ekki verið nær að syngja þjóðsönginn og sleppa því að senda fingurinn út í loftið. Tíminn mun taka í lurginn á þeim sem hafa óhreint mjöl í pokahorninu. Sá tími er kannski bara ekki akkúrat núna. Beinum kröftum okkar frekar að því að vinna okkur út úr vandanum og aðstoða og hughreysta þá sem illa fara í þessum hremmingum öllum. Skal glaður taka þátt í hvers kyns uppákomum og söngli þegar þetta er allt afstaðið. Þangað til reyni ég að láta gott af mér leiða ef ég mögulega get.

Internasjonalinn.......frusssss! 

Aleigan í 2 Bónuspokum

Hvurslags eiginlega er þetta?

Ekki má maður bregða sér af bæ um stundarsakir! Fór til Argentínu til fiskveiða ( Ekki í lax þó)um miðjan ágúst og var að skríða heim á skerið í gær eftir ágæta ferð í Suður Atlantshafið, þar sem enn er ekki komið á kvótakerfi og mikið er af fiski í sjónum. Hvað blasir svo við Tuðaranum við heimkomuna? Jú, hér er allt komið á annan endann og þynnkan að loknu eyðslufylleríinu ekki læknanleg með neins konar verkjameðölum öðrum en inngripi stjórnvalda. Sorglegt að horfa uppá þetta, en kemur svosem ekkert rosalega á óvart. Mér höfðu borist takmarkaðar fréttir af stöðu mála og ljóst að kreppa væri í raun og vera yfirvofandi. Í flugvélinni frá Kaupmannahöfn og hingað heim var dreift helstu fréttablöðum landsins og greip Tuðarinn eitt þeirra föstum tökum til að reyna að koma sér aðeins betur inn í stöðu mála. Átti von á því að sjá feitletraðar fyrirsagnir og myndir af brúnaþungum fjármálaspekúlöntum á forsíðunni, en hvað blasir síðan við þar? Jú, mynd af biðröð kaupóðra samlanda minna að bíða eftir opnun enn einnar "bráðnauðsynlegrar" eyðslufylleríshallarinnar. Kreppur geta greinilega byrst í ýmsum myndum. Ég segi nú ekki annað. Illt að svona skuli vera komið, en vonandi að réttist úr kútnum með tíð og tíma. Öllum þeim sem illa kunna að fara í þessu amstri öllu, vona ég að verði rétt hjálparhönd eins og kostur er. Sjálfur held ég að ég haldi mig við Suður Ameríku sem vinnustað, svona um stundarsakir að minnsta kosti. 

Farinn til Argentínu.

Síðast var það Kína, nú er það Argentína. Mörg flug og sum ansi löng, en hefst vonandi allt saman. Fer að vora í Argentínu fljótlega, en enn er snjór í fjöllum syðst í landinu, þangað sem förinni er heitið til. Kaupmannahöfn, Madrid, Buenos Aires í fyrstu atrennu en síðan flogið suður til syðstu borgar Argentínu, þaðan sem farið verður út á sjó til veiða. Veiðisvæðið sunnan við Falklandseyjar og eins langt suður og komist verður. Heyrumst með haustinu og smjúts á línuna. 

Húsbílaóværan.

Nú þegar einni mestu ferðahelgi sumarsins er lokið, er eitt sem Tuðarinn er dulítið að spá í og eiginlega hálf argur yfir.: Allir þessir ferköntuðu plastkassar á hjólum, sem í daglegu tali eru víst kallaðir húsbílar. Húsbílar..... hús + bíll. Hús ferðast yfirleitt ekki mjög hratt og það virðist einnig eiga við um þessa þjóðvegaóværu sem húsbílar kallast. Þó eigendurnir sitji með bros á vör og dáist að útsýninu á 60 kílómetra hraða, er ekki alveg víst að hinir sem á eftir koma í þúsund metra röð sjái fegurðina sömu augum, vegna þessara vélarvana hjólakassa. Upp allar brekkur, sem eru nú ekki fáar hér á landi, eru þessir kassabílar með kúkinn hálfan úti við það eitt að komast hraðar en snigillinn og á flatlendi mætti halda að þetta dót gengi fyrir sólarsellum. Er þetta fyrirbæri einungis hannað fyrir Holland eða Danmörku? Áfram drattast þetta kassarusl á þjóðvegum landsins á hraða sem ætti hreinlega að banna og spurning hvort þetta ætti nokkuð að fá að vera á ferðinni, nema yfir blánóttina, þegar allir sem geta ferðast á eðlilegum hraða, hafa komið sér á sinn stað. Væri gaman að safna saman blótsyrðum helgarinnar í garð húsbíla sem rétt drullast á miðbæjarhraða um vegi landsins og gera ansi marga að hálfgerðum, ef ekki algerum, óargadýrum í umferðinni. Viss um að hægt væri að auka hraðann um helling hjá kassabílunum, einungis með orku blótsyrðanna. Um svona helgi, sem nú er liðin,(já og reyndar alla daga ársins) er lágmark að vera sem næst hámarkshraða á þjóðvegunum, en ekki einhverju Bankastrætisgutli.   Vona annars að allir hafi átt góða helgi og komist heilir heim að lokum.

Að skjóta, eða skjóta á.

Það er talsverður munur á því að skjóta mann eða skjóta á hann. 'Í hvert skipti sem okkur eru færðar fréttir af því að einhver hafi verið skotinn, göngum við út frá því að viðkomandi hafi verið skotinn til bana. Þannig var því alls ekki háttað í þessu tilviki, heldur var maðurinn særður, sem betur fer, en ekki drepinn.  (Ekki það að það hafi sýnst nauðsyn á þessum vitleysisviðbrögðum hermannsins.) Fyrirsögnin er hins vegar villandi, eins og svo margt annað sem vellur yfir okkur þessa dagana í árlegri gúrkutíð og tilvistarkreppu hérlendra fréttamann og misviturra frétta"snarenda". Íslenskri fréttamannastétt hrakar hraðar en íslensku efnahagslífi, nú til dags, svei mér þá.

Skutu palestínskan fanga

Lausn á fjársveltinu fundin!

Ef hægt er að hala í sektarkassann sextán hraðasektum á einum klukkutíma, hvernig í áranum stendur þá á því að ekki er lögreglubíll á þessu svæði 24/7? Tuðarinn var tekinn á ólöglegum hraða fyrir skömmu og mér reiknast til að þessar sextán sektir skili um það bil fjögur hundruð og áttatíu þúsundum í kassann, nema greitt sé innan ákveðins tíma. Þá er veittur tuttugu og fimm prósenta afsláttur. Með afslætti ætti þessi klukkustund að gefa um þrjú hundruð og sextíu þúsund krónur. Það sinnum tuttugu og fjórir gera átta milljónir sexhundruð og fjörtíu þúsund á sólarhring. (Svo eru menn að þrátta um kostnað við bæjargæslu um nætur og helgar í Reykjavík og nágrenni!) Það sinnum þrjúhundruð sextíu og fimm dagar, gera þrjá milljarða eitt hundrað og tíu milljónir og fjögur hundruð þúsund, takk fyrir. Bara í Svínahrauni!

Það er deginum ljósara að dómsmálaráðherra, fjármálaráðherra, forsætisráðherra og aðrar óværur sem á okkur herja þessa dagana, eru engan veginn starfi sínu vaxnar. Heilbrigðisráðherraómyndin mætti  einnig fljóta með á þessum lista um vanhæfi og getuleysi.

Talandi um fjárskort....frusss!

 

Sextán teknir fyrir of hraðan akstur

Möppudýr og blýantsnagarar til Brussel.

Sennilega er einn stærsti kostur þess að ganga í Evrópubandalagið sá, að hægt verður að senda möppudýr, steingeldar kerfisbullur, pabbadrengi og blýantsnagara til Brussel í bunkum. Mjög gott að losa sig við alls kyns vandræðagemlinga úr stjórnsýslunni með þessum hætti. Það mætti til að mynda senda syni fyrrverandi ráðherra og eða bankastjóra til Belgíu. Það þarf þá ekki að deila um stöðuveitingar hér á landi þeim til handa. Það er öllum fjandans sama um hvaða lið er sent til Brussel og ekki verið að troða á neinum, með sendingum þangað. Allar stöður yrðu því mannaðar úrvalsfólki hér heima, en öllu vafaliðinu, pabbadrengjunum, möppudýrunum og leiðindapúkunum mokað til Brussel. Evrópubandalagið er jú þegar upp er staðið ekkert annað en steingelt möppudýraskrímsli sem ekkert gerir annað en að meiða þá sem þangað æskja inngöngu, eða eru þegar gengnir í þennan ófögnuð. Möppudýrin skilja þetta hins vegar ekki og sjá inngöngu í óværuna sem lausn allra mála.Fari þau sem flest til Brussel.

Íslenskum starfsmönnum fjölgað í Brussel