"Þyrluslys í beinni"Ömurlegasta fréttamennska sem til er!!!!!!

"Að sýna beint" frá slysum sem hafa orðið er einhver ömurlegasta fréttamennska sem til er. Í þessum töluðu orðum er verið "sýna beint" frá slysstað, þar sem þyrla Landhelgisgæslunnar TF-SIF brotlenti fyrir stundu "milli Straumsvíkur og Hafnarfjarðar".  Vonandi að satt reynist, að allir um borð hafi bjargast. Veit einhver annars í hvaða ástandi mennirnir eru? Er búið að tilkynna ættingjum tíðindin?????!!!!! Æsingurinn við að koma fréttinni í loftið er slíkur að sá sem talar undir fréttinni veit andskotann ekki neitt og bara blaðrar eitthvað út í loftið...."Þarna er bátur á leið að flakinu"....."ef myndin er nógu skýr, má kannski sjá flak þyrlunnar mara í hálfu kafi".... Að horfa uppá þessa fréttamennsku er ekkert annað en grátlegt og svo mikið er víst að þetta setur punktinn yfir i-ið í minni áskrift. Skilur þetta blessaða fólk ekki að Ísland er ekki Ameríka með hátt í 300.000.000. íbúa? Svei ykkur!!!!!! Ætla ekki að hella frekar úr reiðiskálinni að sinni, en held örugglega áfram að bölva með sjálfum mér. Enn og aftur.: SVEI YKKUR!!!!!!!!!!!!!! og skítt með fréttastofu Stöðvar Tvö. Lægra verður ekki lagst í fréttamennsku. DV gaf tóninn. en þið hafið toppað það. 

Ja hérna jæja!

Það er nú gott að blessað dýrið skuli enn vera á lífi. Mikið held ég að nötri undir, í bloggheimum, næstu daga, eða verður þögnin sem fylgir skömminni yfirsterkari? "Time will tell"  

Hundurinn Lúkas á lífi

Asparfrjóatuð!

Aspir geta verið fögur tré. Fljótvaxnar og tilvaldar fyrir þá sem ekki nenna að bíða í fimmtíu ár eftir almennilega hávöxnum trjám í sínum garði. Í minni götu er ógrynni aspa og það ekkert smáar. Reyndar svo háar að þær byrgja mér orðið alla sýn til Snæfellsjökuls og nágrennis yfir sumartímann og langt fram á haust. Nú stendur yfir "frjólosun" hjá þessari andsk..... óværu og er gatan öll og garðurinn minn eins og skíðasvæði yfir að líta. Búinn að myndast við bera fúavörn á sólpallinn og húsið en varð að játa mig sigraðan fyrir sviffrjóum asparinnar í gær. Það sem ég vildi að væri með tekk lit, er orðið eins og hvítt ríateppi og enginn tilgangur að halda þessu áfram. Hér er ekki snjókoma, hér er frjókoma! Farið að safnast í skafla og tæpast hægt að dvelja utandyra fyrir þessari óværu. Gott ef skellur ekki á skafrenningur af þessum andskota, ef hreyfir vind. Vitin full af hálfgerðri bómull og liggur við að maður snýti túrtöppum! Aspir eru fallegar, en þetta er einum of. Farinn að hugsa til þeirra eins og blessaðs mávsins og lúpínunnar.: Allt er gott í hófi, en fyrr má nú andsk.....! Ætti að vera í einhverjum reglugerðum að tré mættu ekki verða hærri en húsin sem þau standa við og allar aspir skuli fella, er þær ná tuttuga ára aldri. Ég hef þegar fellt ellefu stykki í mínum garði. Atsjú. 

KLUKK!

 Það eru margir að "klukka" á blogginu. Hef ekki heyrt eða séð þetta orð síðan Guð má vita hvenær, en tók ósjálfrátt kipp og klukkaði áfram eins og vitlaus maður, án þess að kynna mér á nokkurn hátt hvað væri eiginlega um að vera.Vona bara að ég hafi ekki móðgað neinn eða pirrað með uppátækinu. Líkt mér að æða af stað í akkorðsklukk án nokkurrar hugsunar, en svona er nú bara tuðarinn.  Var síðan klukkaður af einum af mínum eftirlætis bloggvinum, honum Hlyni, sem ekki vissi hvaðan á sig stóð veðrið blessaður kallinn og seinna af henni Erlu fögru, sem nýkomin er af hönnuðasýningu í Japan. Búinn að kynna mér leikreglurnar örlítið betur( Sem ég hefði betur gert strax í upphafi, í stað þess að æða af stað eins og naut í flagi. Orðið KLUKK kveikti bara einhvern neista sem hleypti mér kappi í kinn og þá er ekki að spyrja að því…maður klukkar út og Suður án nokkurar hugsunar. Týpískur ég) Að gefa upp átta, segi og skrifa, átta staðreyndir um sjálfan sig, getur nú verið ansi snúið. Tala nú ekki um þegar maður er ekki með nema kannski fjórar til fimm á hreinu, en ætla að reyna.:

1.    Er samsettur úr fólki sem upphaflega bjó í Hnífsdal, Álftanesi, Garði og Bjarnarfirði á Ströndum.(What a mix!)

2.       Er þverhaus og nota EKKI auðkennislykil eða heimabanka.   (Nema hvað)

3.       Er tregur til að láta segjast af bankanum mínum og fæ ALLTAF stimpil á greidda reikninga, þó þeir þurfi að sækja hann ofan í kjallara.(Borga í bankanum)

4.       Er steingeit og kominn langt yfir miðjan aldur (47), miðað við meðalævilengd karla á Íslandi.(Sem er nú bara nokkuð löng, svona miðað við það sem gengur og gerist)

5.       Er afi og þar af leiðandi einnig faðir.(Eins og það þurfi nú að koma fram)

6.       Er tuðari og þverhaus.(Sem liggur í augum uppi.)

7.       Er forfallin aðdáandi góðs rauðvíns, osta og Pink Floyd.(Vel marineraður eftir öll þessi ár)

8.       Er bara þokkalega sáttur við sjálfan mig, enda engu hægt að breyta héðan af og engin ástæða að velta sér upp úr því sem hefði getað orðið, eða betur mátt fara. Restin verður kannski tekin með örlítið minni hraða.( En samt eins miklum og líkamshulstrið  þolir) 

Man ekki lengur hver ég klukkaði en nokkuð viss um að þau voru örugglega fleiri en átta.

Þverhausar og tuðarar eiga afskaplega erfitt með að spóla til baka.  

 

Umhverfismat?

Þar sem borgarbúar settu eitt sinn niður kartöflur og ræktuðu matjurtir, er nú risinn þessi líka kassinn! Þar sem enginn nennir lengur að setja niður kartöflur, var alveg kjörið að planta enn einu stórhýsinu þarna niður. Landið hvort eð er ekki notað til neins nema að horfa á það. Það er hrikaleg stærð á þessu húsi! Annað verður ekki sagt. Líkist meira álveri en verslunarhúsnæði, svona eins og er. Vonandi samt að húsið verði nú ekki í einhverjum gargandi neonlitum og eigendur reyni að milda sjónmengunina með einhverjum hætti. Húsið sennilega farið í grenndarkynningu og umhverfismat og allan þann pakka, gerir maður ráð fyrir, eða þarf ekkert svoleiðis lengur? Lítið hefur að minnsta kosti borið á mótmælum gegn þessari byggingu, svo líklega eru bara allir sáttir við sitt, í nágrenninu. Þarna er líka kominn ákjósanlegur flugvöllur á þakinu fyrir vélflugur ýmiskonar. Þeir sem það sport stunda eru einmitt með aðsöðu handan Vesturlandsvegarins, gegnt húsinu.

Verslunarhúsnæði byrjað að taka á sig mynd

"B'AKNIÐ BURT"!!

Þegar núverandi forstjóri Landsvirkjunar var á sínum tíma kosinnn formaður FUS, Félags Ungra Sjálfstæðismanna, var helsta slagorð þess félagsskapar "Báknið Burt".  Slagorðið beitt og hugur í mönnum og konum að láta kné fylgja kviði. Sem óharðnaður unglingur flaut ég með og taldi hag mínum og skoðunum best borgið innan vébanda þessara samtaka, sem ég taldi á þeim tíma "The state of the art" í pólitik. Pólitík er hins vegar slæm tík og vegna þess, nagar maður hendur sínar upp að öxlum í dag. Friðrik, Davíð, Hreinn Lofts., Hannes H. og fleiri. Gott ef ekki Jón Magnússon, sem nú er "Frjálslyndur" þingmaður í 5. tilraun, bauð sig ekki fram á móti Friðrik. Efnilegir kandidatar framtíðarinnar og allir sem einn sammála slagorðinu. FS, HHH og DO fara hins vegar mikinn í dag, en bara á öðrum pól og búnir að gefa skít í gömlu hugsjónina, enda gulltryggðir á spena "Báknsins" sem þeir eitt sinn fordæmdu svo hart, fyrir lífstíð, allir þrír. Hreinn hins vegar, vonandi þokkalega tryggður á hinum endanum, sem berst við "Báknið", en það er önnur saga sem ekki verður tuðað um hér. Fyrrum boðberar "Báknið Burt" grýta nú sauðsvartan almúgann með frjálshyggjukjaftæði og blaðri um hagkvæmni stærðarinnar, álverum á hverja vík og fjörð, en gleyma að það var og er einstaklingurinn sem skiptir máli og það er hann sem í dag hefur, sem betur fer, fleiri vopn sér til varnar, en tíðkaðist á tímum "Baknið Burt" daganna. Þessir herrar hafa akkúrat engar áhyggjur af eigin afkomu, enda "Báknsmenn" og því alveg sama hvaða skandal þeir hrista fram úr erminni, þeir fá alltaf sitt. Setja sér meira að segja sín eigin eftirlaunalög hvað þá meir. Komnir heilan hring í "hugsjónagrautnum" og telja sig geta hraunað yfir allt og alla, alltaf. Ætlast síðan til að borin sé virðing fyrir þeim og því sem þeir leggja á borð??!! Vel klæddir, hafa greiðan aðgang að fjölmiðlum, vel máli farnir og kunna réttu klisjurnar. Vildi sem sagt sagt hafa að nú sé tími til að staldra aðeins við og fara í smá naflaskoðun varðandi virkjana og vaxtamál. Þessir herrar, sem eitt sinn fordæmdu "Báknið" eru sjálfir orðnir "Bákn" og rétt að spyrna við þeirra poti með öllum tiltækum ráðum. VIÐ eigum orkuna. VIÐ viljum hafa eitthvað að segja um í hvað hún er nýtt. Það er "Báknið Burt"!

"Mótvægisaðgerðir"?

Stundum læðist að mér sá grunur að ég sé annað hvort heimskur, eða bara hreinlega nautheimskur. Vona að ég sé bara heimskur. Því miður svo heimskur, að ég get ekki með nokkru móti komið auga á að með því að flýta vegaframkvæmdum, sé "það liður í aðgerðum til að mæta skerðingu á aflamarki á næsta fiskveiðiári." Það lá fyrir að farið yrði í þessar framkvæmdir, en hvaða áhrif til batnaðar eða sárabóta hefur þetta fyrir þau fyrirtæki og einstaklinga sem missa spón úr aski sínum, nú eða hreinlega tapa askinum, þegar skerðing á þorskafla tekur að rífa í ? Væri fróðlegt að heyra frá einhverjum sem vit hefur á þessum málum og skilur hvað verið er að meina. Þar sem greindarvísitala mín liggur mjög neðarlega á skalanum, ætla ég ekki einu sinni að reyna að skilja samhengið í þessu. Hverju ætla menn svo að flýta þegar þessu verður að fullu flýtt? Ef það er "trixið" þegar skóinn kreppir, að flýta bara öllu klabbinu, verður sennilega búið að járnbrautavæða landið innan örfárra ára. "Mótvægisaðgerðir ríkisstjórnarinnar" eru þegar orðnar að klisju og ekki orð að marka. Orðið álíka trúverðugt og orðskrípið  "Kolefnisjöfnun". Skelfing er ég  heimskur að láta þetta fara svona í taugarnar á mér, en ég er jú tuðarinn, svo ég get ekki annað.

Samgönguráðherra: fjármagn flutt til sem var þegar á samgönguáætlun

Miskunnarvottur

Það fór aldrei svo að mannræningjarnir sýndu ekki miskunn. Undarlegt, eða hvað hve menn annars leggjast lágt í baráttunni fyrir sínum málstað?. Mannskepnan er versta skepna jarðar, þegar því er að skipta. Nígería með öll sín auðæfi og alla sína misskiptingu, er sennilega eitt hróplegasta dæmi veraldar um djöfulskap vestrænna "gilda" sem ganga út á það eitt að mergsjúga olíu úr jörð, "no matter what". Látum þjóðum blæða, hefjum innrásir, fjarlægjum þjóðhöfðingja,.......og svo framvegis. Bara ef við fáum olíu. Síðan skilur enginn neitt í neinu að þeir sem fyrir barðinu verða í þessum löndum, skuli grípa til óyndisúrræða sem þessara, að ræna barni. Endalaust fjallað um afleiðingarnar, en enginn spáir í orsökina. Vantar ekki eitthvað í jöfnuna? 

Þriggja ára stúlku sleppt í Nígeríu

Glæsikerran beltalaus?

Eitthvað var forseti vor utan við sig í prufutúrnum á nýja glæsilega forsetabílnum. Hann var ekki með beltið spennt! Sælubrosið ósvikið og sennilega bara gleymt því. Bíllin hinn glæsilegasti, en mér er spurn.: Hversu umhverfisvænt er framleiðsluferlið á svona sjálfrennireið?

Forsetaembættið fær umhverfisvænan bíl

Sms hátíð-Foreldrar

Blaðamenn virðast vera svo sveltir af fréttaleysi þessa dagana að þeir eru farnir að búa til fréttir fyrirfram! Er starfskynning í gangi á Mogganum, eða er gúrkan alveg að drepa menn þar á bæ? Blessað fjölmiðlaliðið hefur ekki enn fundið sms hátíðina sem básúnað var um fyrir skömmu síðan, svo nú verður sennilega hvergi vært fyrir "væntanlegum sms hátíðum". Hver einasti mannfögnuður, erfidrykkja, saumaklúbbur og samkoma útmáluð sem væntanleg sms samkoma og löggan á milljón við að færa mannskap og þyrlur á milli staða til að koma í veg fyrir ósómann. Besta mál að hafa gæsluna í lagi, en þessi fréttamennska er ....cheep! svo ekki sé meira sagt. Unglingar eru langflestir hið besta fólk. Meðal þeirra leynast svartir sauðir, alveg eins og meðal okkar gamlingjanna, en svona dómharka fyrirfram er illlíðanleg (þrjú ell) í virtum miðlum. Virðugleikinn dofnar hratt, ef þetta er frétt. Frétt er eitthvað sem er að gerast, eða er þegar orðið, ekki eitthvað sem kannski verður um næstu helgi.... eða ekki. Það er síðan foreldra að haga sér eins og fólk, en ekki barnanna, þegar kemur að útihátíðum og öðrum viðburðum. Þeir eiga að hafa vit á því að hafa hemil á börnum sínum. Ef foreldrar telja sig ekki geta haft stjórn á börnum sínum, er það þeim sjálfum að kenna og sennilega rétt að byrja strax á að benda ungu barnlausu fólki á að, ef þau telji að skóli og ríki eigi alfarið að ala upp börnin þeirra, sé sennilega best að klippa á eistnalippur og eggjaleiðara strax á morgun. Þannig verði lífið "carefree" og engar áhyggjur af útihátíðum eða barnabörnum, ....ever.  

Fjöldi unglinga stefnir á Írska daga