Hvað nú?

Já, já Jóhanna. Þinn tími kom og þú hefur nú komið þessu máli á koppinn, þó Tuðarinn hafi ekki nokkra einustu trú á að þetta fullveldisafsal verði samþykkt þegar þjóðin verður að endingu spurð. Þjóðin sem þú treystir ekki til að velja um hvort hún vildi, eða vildi ekki hefja þessa "vegferð", eins og margar pílitískar druslur kjósa að kalla þetta upphaf að endalokum fullveldis á Íslandi. Gott og vel. Þetta mál er frá í bili. Sendið nú hverja sendinefndina af annari, skipaða flokksgæðingum og öðru fánýtu liði í aðildarviðræður um inngöngu Íslands í þetta eitt ömurlegasta skrifræðisskrímsli mannkynssögunnar. Þar munu margir kerfiskarlar, fyrrum þingmenn, flokksgæðingar, vinir, vinkonur og aðrir vandamenn, maka krókinn á yfirvinnu og ferðalögum á okkar kostnað, með von um að fá einn daginn að verma bekkinn í Brussel, þar sem rúmlega þrjú hundruð þúsunda manneskja þjóð hefur akkúrat ekkert minna en andskotann ekki neitt að segja um sjálfa sig, hvað þá aðra. Frasinn "Minn tími mun koma" hefur snúist undarlega upp í andhverfu sína, svo ekki sé meira sagt. Meðan Ísland brann og heimili og einstaklingar töpuðu öllu sem þeir áttu, sjáfsvirðingu sem eignum, fór nánast allt púður "þíns tíma" í að afsala okkur fullveldinu og um leið horfa fram hjá þeim vanda sem þú og þitt fylgifé lofaði að leysa með einum eða öðrum hætti. Tíminn sem farinn er í þetta mál er orðinn svo langur og upplausnin svo alger orðin,  að nú hefur "þinn tími" búið svo um hnútana að varla er orðið borð fyrir báru með nokkurn skapaðan hlut sem skiptir raunverulegu máli lengur fyrir þessa þjóð. "Þinn tími" er orðinn ansi dýr, Jóhanna. Sennilega dýrasti tími sögu vorrar. Hann hefði betur aldrei komið. Skjaldborg um hvað? Hvað nú?     

Yfirlýsing forsætisráðherra um ESB

Efnilegur ungur maður.

Það er ekkert minna en ofurgeisli sem "strækar" mann, þegar heyrist af hugsjónamönnum, vinstra megin í stjórnmálunum og af háðungarpöllum Alþingis. Ungur maður sem segir það sem honum býr í brjósti! Megi allar góðar vættir gefa okkur 63 svona stykki, sem síðan samþykkja að "fækka sér" í svona tuttugu manna og kvenna teymi, sem leitt geta okkur út úr ófögnuðinum. Ásmundur er vonandi það sem koma skal, hvar svo sem í flokki svona Ásmundar finnast.

ÞJÓÐSTJÓRN STRAX OG 'ASMUND MEÐ!

Tal um stjórnarslit undarlegt

Já eða nei!

Er það til of mikils mælst að þeir sem kjörnir eru á Alþingi hafi skoðun? Má vera skoðun á hverju sem er og líka bæði illa og vel af samflokksfólki, sem andstæðingum. Hvað er eiginlega gert við fólk sem kemst á Alþingi? Dr. Jekyll og Mr. Hyde eru eins og fermingardrengir við hlið "skoðanaskiptaamlóðanna" sem nú sitja á þingi, en ÞORA EKKI að kjósa eftir eigin sannfæringu. Er einhver klefi í kjallaranum sem "afhugsjónar" þingheim, áður en honum er hleypt upp á efri hæðina á takkaborðið, við hvern stól, sem þó hefur einungis fjóra hnappa. Já, Nei, Situr hjá eða lætur "FLOKKINN" ráða.? Þvílikar druslur og duslimenni hafa sennilega ekki setið Alþingi svo lengi sem elstu menn muna, enda muna þeir ekki neitt. Þeir sem á annað borð komast á Alþingi ættu að sjá sóma sinn í að hanga ekki eins og afhugsjónaðir aumingjar á "SITJA HJÁ" takkanum, heldur gera álit sitt opinbert. Það er mikið lagt á putta þingmanna þessa dagana, en tengingin upp í haus rofnar vonandi ekki hjá þeim sem hafa eitthvað annað og meira en hálm á milli eyrnanna. Íslenska þjóðin fylgist með hverju og einasta ykkar og því eins gott að ALLIR þingmenn og konur greiði atkvæði JÁ eða NEI. "SITUR HJÁ" er einfaldlega ekki í boði í þessu máli. 

Hjáseta kann að ráða úrslitum

Andskotans hræsni.

Af orðum sauðfjárbóndans má ráða, að það að þurfa að kokgleypa og kyngja stóryrðunum og loforðunum sem sett voru fram fyrir kosningar, geti reynst nauðsynlegt, til að stjórnin haldi velli. Þetta sýnir svo ekki verður um villst, að hérlendir stjórnmálamenn eru lítið annað en pólitískar druslur og dusilmenni sem gefa skít í þjóðarhag. Það skiptir semsagt ÖLLU máli að STJÓRNIN HALDI VELLI, sama hve miklu þarf að kyngja, bakka með, svíkja eða ganga á bak orða sinna. Ráðherra og þingmannastólarnir ganga þjóðarhag framar og hugsjónin nær ekki lengra en þetta. Eftir að búið er að draga stólinn undir rassgatið á þessu liði, hvar svosem í flokki það "tilbehörer" virðist ekkert heilagt. Ekki einu sinni eigin sannfæring. Hvað ætli rollubóndinn hafi oft sagt "ALDREI ESB" fyrir kosningar? Einhver sem getur uppfrætt einfaldan Tuðara á því?

ÞJÓÐSTJÓRN STRAX!!!!!!!! Þetta fólk veit ekki hvað það er að gera þjóðinni. Það skilur ekki hagfræði, það skilur ekki þarfir samlanda sinna og það sem verst er, það hefur kastað fyrir róða eigin hugsjónum.

 Enn og aftur í ég veit ekki hvaða skipti.: ÞJÓÐSTJÓRN STRAX!   

Erfitt mál fyrir VG

Fréttamennskusori.

Hvort sem Davíð Oddsson, ellilífeyrisþegi, (Sem Steingrímur kaus að kalla hann, illu heilli, öðrum ellilífeyrisþegum til minnkunar, en þó Steingrími mest sjálfum)sem hvítþvær hendur sínar af fjármálasukki liðinna ára, hvaða stöðu svosem hann gegndi á þeim tíma(sem eru sennilega fáar), eða sauðfjárbóndinn og fyrrum íþróttafréttamaðurinn af Langanesinu hafa rangt eða rétt fyrir sér, er ljóst að mati Tuðarans, að verið er að drepa þjóðhagslega lífsnauðsynlegum málum á dreif með einhverju ömurlegasta "fréttamennskuplotti" sögunnar hér á landi. Tuðaranum er Andskotans slétt sama hver sagði hvað, olli hverju, átti minnisblað um hvað, gat vísað á, vitnað til eða bara bullað út um eyrun á sér um hvað gerðist fyrir eða eftir þetta eða hitt, þessa stundina. Ég vil enn geta treyst því að sökudólgar verði dregnir til saka þegar þar að kemur og verði teknir ærlega í karphúsið, hvaða flokki sem þeir tilheyrðu, eða viðskiptablokk. Ég er enn ekki svo vonlítill orðinn að ég treysti því ekki að það verði gert. Þegar vonin ein er eftir, er talsvert eftir. Við munum standa þetta af okkur. Spurningin er "einungis" hversu dýrt verður það? Það er jú ansi stór spurning og það er það sem ALLT snýst um!

Það sem veldur Tuðaranum einum mestu áhyggjum þessa dagana er ömurleg frammistaða fjölmiðla á Íslandi. Þar virðist ríkja alger hugsunarskortur og fagleg umræða vandfundin, með örfáum undantekningum, enda flestir helstu fjölmiðlar landsins alfarið, eða að hluta til, í eigu þeirra sem stóran hluta áttu í "HRUNI ÍSLANDS", eða þeirra sem nú vilja draga okkur með góðu eða illu inn í eitthvert ægilegasta skrímsli skrifræðis og "Sovétmennsku" sem um getur.... ESB. Þeir fréttamenn sem í dag flytja okkur "fréttir" af gangi mála og telja sig umkomna að geta verið að "plammera" fyrrum "sómamenn" útrásarinnar í einhverjum fyrirfram pöntuðum viðtölum eða "heat of the moment" "yfirheyrslum" ættu að skoða sinn hag gjörla. Þau sem sungu með fyrir ári síðan, eru allt í einu orðin leiksoppar í viðbjóðslegasta leikriti fjölmiðlasögu vorrar. Haldi þetta lið að almenningur sé alvitlaus, skjátlast því hrapalega. Það er ekki lengur hægt að deyfa vitund þessarar þjóðar með bensínstöðvasumarleikjum og sirkúsbrellum fjölmiðla. Það er hugsandi fólk sem býr í þessu landi og nú er "ÞESS TÍMI KOMINN"!.  Það skiptir akkúrat andskotans engu máli hvað Davíð segir lengur, eða hvað Steingrími J. finnist um það sem Davíð segir eða heldur fram. Okkur vantar lausnir, NÚNA!! AÐ ÞETTA SÉ AÐALFRÉTTAEFNIIÐ SÝNIR HVE FYRIRLITLEGA ER KOMIÐ FYRIR FJÖLMIÐLUM Á ÍSLANDI OG ÞEIM  SEM ÞAR STARFA. Ef hérlendir fréttamenn og konur hefðu samvisku og bein í sínu nefi, gengju þau út á morgun af flestum fjölmiðlum, en það mun sennilega fyrr frjósa í Helvíti en að það gerist. Fjölmiðlafólk á Íslandi er nefnilega að stórum hluta orðið gegnsýrt af gjálífi undanfarinna ára, enda nánast orðin eign þeirra sem áttu þá og hafa spriklað eins og til hefur verið ætlast.

ÞJÓÐSTJÓRN STRAX!!!!! Og ekki einn einasta þingmann í hana sem sat meðan Ísland hrundi!  Við þurfum lausnir en ekki svona djöfullegar uppákomur sem stuðla einungis að því að auka á sundrungu og marklaust karp um "Hver gerði Gerði grikk í sumar".

ENN OG AFTUR.: ÞJÓÐSTJÓRN STRAX! Kæru landar, gefið skít í pólitíkina og allt sem hún hefur "upp á að bjóða". Við þurfum fólk sem tekst á við hlutina af skynsemi, en er ekki blindað af pólitík, enda einungis fundin upp til að þjóna rassgötum þeirra sem hana stunda. Hvort aðstoðin sem við þurfum núna kemur að utan eða innan skiptir litlu máli. Við þurfum aðstoð og verðum að vera snögg að átta okkur á því hvernig við náum best að bjarga okkur.  Eitt er víst.: Við gerum það EKKI með aðstoð hérlendra fjölmiðla. Þar vinnur nú nánast einungis fjarstýrður hópur strengjabrúða sem setur það eitt á prent og út í loftið sem sundrað getur og tvístrað þjóðinni sem mest hann getur, samkvæmt valdboði að "OFAN" enda hagur stjórnenda þar að halda okku óupplýstum. Ef þetta er ekki sori þá veit ég ekki hvað. Skammist ykkar barasta, "fréttamenn" að missa svona af lestinni, meðan Ísland brann.

ÞJÓÐSTJÓRN STRAX!

Ósvífin og ódýr afgreiðsla

Þetta reddar öllu!

Loksins kom fram á sjónarsviðið tillaga frá Vinstri Grænum, sem bjargað getur heimilum þessa lands. Nú verður hægt að borga af Audi jeppanum hans Páls með þremur afborgunum á ári hjá hinum almenna borgara sem hefur ekkert val um þennan óskapnað. Hvurn andskotann voru menn að fjargviðrast út í Sovétið eiginlega? Ég bara spyr.

Gjalddagar útvarpsgjalds þrír

Kúba norðursins? Nei, Nígería.

Haft var eftir Gylfa Magnússyni viðskiptaráðherra í dag, að ef Ísland ekki greiði Ice-Save skuldirnar eins og búið er að semja um, muni Ísland einangrast í samskiptum sínum við aðrar þjóðir og verða að einhverskonar Kúbu norðursins. Sennilega nokkuð til í því og ekki beint sá stimpill sem þessi þjóð kærir sig um að fá á sig, eða hvað? Kæru Íslendingar.: Hvaða stimpill teljið þið að þegar sé kominn á þessa þjóð? Þegar síðan "reddingarplan" sauðfjárbóndans af Langaneshorninu og hans samverkafólks er skoðað, kemur í ljós að jafnvel þó brennivínsflaskan væri hækkuð í milljón ónýtar krónur per pitlu, bensínið í tíu þúsund kall líterinn og sígarettupakkinn í tuttugu og fimm þúsund kall, myndi það samt ekki duga til að rétta úr kútnum. Þetta dæmi gengur einfaldlega ekki upp og mun aldrei gera. Við erum nú þegar einangruð frá öðrum þjóðum. Við erum nú þegar fyrirlitin og útmáluð sem samansafn svikahrappa og fjárglæframanna. Það er ekki litið á okkur sem Kúbu norðursins. Við erum Nígería norðursins, hvort sem fólki líkar það betur eða ver. Það er lítill munur á kúk og skít og í raun skiptir engu hvaða nöfnum þessi þjóð verður nefnd hér eftir. Íslenskir stjórnmálamenn í öllum flokkum, sem sátu á þingi fram að hruni, eru landeyður og dusilmenni. Samansafn hálfsofandi eiginhagsmunapotara og tækifærissinna sem ekki svo mikið sem hálfa mínútu báru hag heildarinnar fyrir brjósti. Það hafa ekki setið ærlegir þingmenn á Alþingi frá því Vilmundur Gylfason og Eyjólfur Konráð Jónsson voru og hétu. Þeir börðust fyrir hugsjónum sínum, en var ávallt bolað til hliðar, illu heilli, því hinir og þessir armar hinna ýmsu flokka og persóna töldu sér ógnað af þeim. Eftir situr "Hnýpin þjóð í vanda" sem getur ekki einu sinni treyst á ábyrga umræðu í fjölmiðlum, því svikahrapparnir eiga þá flesta meira og minna. Hækkið þið bara allt til andskotans og leggið á okkur  allar þá álögur sem ykkur dettur í hug, þið auma stjórnmálamannahyski. Það kemur að því einn góðan veðurdag að VIРBORGUM EKKI! ÞjÓÐSTJÓRN STRAX, STRAX, STRAX! Svei ykkur sem komuð okkur í þessa stöðu. Ykkar nöfn munu verða rituð í sögubækur Íslands sem lándráðamanna og kvenna sem ýmist sváfuð á verðinum, eða högnuðust á ástandinu. Djöfullinn sjálfur að horfa upp á þetta! 

Boðar auknar álögur á áfengi og tóbak

"UtrásarSýkingar" og "Fjölmiðlaaumingjar".

Það er ekkert minna en viðbjóðslegt að fylgjast með drullunni sem vellur upp á yfirborðið þessa síðustu, en alveg örugglega ekki þá verstu, daga sem hvert "leyndarmálið" af öðru er afhjúpað sem útrásar"víkingarnir" okkar voru að garfast í. Reyndar er varla viðeigandi að tala lengur um útrásarvíkinga. Nær væri að tala um þvagrásar eða jafnvel saurrásarvíkinga, ef því er að skipta. Reyndar er allt of gott að kalla þetta fólk víkinga. "Sýkingar" væri sennilega betur fallið til að lýsa eðli þeirra. Varla merkilegra en það. Hvort heldur þetta fólk tilheyrði þessum flokknum eða hinum, hét Jón eða Gunna, átti eitthvað eða ekki neitt fyrir fylleríið, skiptir ekki lengur máli. Upp úr stendur að Ísland er á hausnum og Íslenskir stjórnmálaflokkar eru minna virði en hundaskítur á skó og skiptir þá engu hvort þeir teljast til hægri, vinstri eða á miðjunni. Hinn almenni borgari á síðan bara að borga. Eitt af því grátlega sem gerðist  í Hrunadansi græðgisvæðingarinnar var það að fjölmiðla"heimurinn" á Íslandi varð svo tengdur þessum Sýkingum að það er ekki einu sinni hægt að tala um upplýsta umræðu lengur. Það allra grátlegasta er þó það, að stór hluti almennings flaug á sveifina með ruglinu og hugsaði sinn gang ekki lengra en að nálgast sem mest, fyrir sem minnst, alveg eins og "Sýkingarnir". Það á hver maður og kona að hugsa. Það er lágmarkskrafa til hins almenna borgara. Það er engu líkara en að enginn hugsi neitt lengur og það er einmitt það sem Sýkingarnir vilja. Þeir eiga alla fjölmiðlana og ráða þar með umræðunni. Með tímanum deyfa Sýkingarnir umræðuna þegar hentar og koma síðan til baka sem verndandi englar sem borga einhvern tillaskít til að klóra yfir LANDRÁÐIN. Almenningur les síðan um góðmennsku þeirra í ÞEIRRA FJÖLMIÐLUM og verðkannanir verða enn á ný helsta fréttaefni fjölmiðla á Íslandi og munar þá sennilega sjaldan minna en einni krónu milli Sýkingablokka. 

Það þarf fólk til að skrifa og segja fréttir. Það þarf ALMENNILEGT fólk til að skrifa fréttir og fjalla um þjóðfélagsmál. Það þarf almennilega fjölmiðla til að sýna hlutlausa mynd af ástandi líðandi stundar.   Í því hruni sem nú blasir við þjóðinni og er rétt að byrja, eru fréttamenn, blaðasnápar og uppaliðið sem hampaði hvort öðru á forsíðum glanstímaritanna eitthvert ömurlegasta og tækifærissinnaðasta lið sem sögur fara af. Toppinn vermir síðan forseti "vor" sem vonandi skynjar senn að hans tími er liðinn og lætur sér ekki einu sinni detta í hug að bjóða sig fram aftur.

ÞJÓÐSTJ'ORN STRAX!!!!! Íslendingar þurfa lausnir, en ekki flokkapot. Kominn tími til að þjóðin gefi skít í alla flokka og fari að huga að sjálfri sér.  Enn og aftur.: ÞJÓÐSTJÓRN STRAX!! Ef þjóðin skilur ekki nauðsyn þess, á hún bara skilið að kveljast og ætti ekki einu sinni að leyfa sér að kvarta. VIÐ getum eitt og annað, ef vilji og samheldni næst. Það eru mörg Macau mál á leið í umfjöllun. Það voru peningarnir OKKAR sem var verið að gambla með! Eigum við bara að kyngja og borga? 

Rifta kaupum á húsi í Macau

"Efnahagshægðir"

Hér í Argentínu fór þjóðin í gegnum svipaðar hremmingar og almenningur og fyrirtæki þurfa nú að kljást við heima á Íslandi. Í raun er það sem gerðist á Íslandi nánast endurtekning á því sem gerðist hér og orsökin að stórum hluta sú sama. Gjörspillt ríkisvald og óheft frelsi "viðskiptamógúla" sem engu eyrðu og fengu að vaða uppi eftirlitslaust. Í Argentínu varð ástandið þó aldrei svo svart að verkalýðsfélög eða aðrir aðilar færu að niðurgreiða iðrafruss. Það er mat Tuðarans að varla sé hægt að komast neðar í nokkurri efnahagslægð en þegar orðið "efnahagshægðir" bætist í orðabókina. Hefði haldið að fjármunum verkalýðsfélaga væri betur varið til brýnni verkefna en þessa. Þegar ég reyndi að útskýra þetta fyrir Edgardo öðrum stýrimanni, stökk honum ekki bros á vör. Hann hallaði sér hins vegar upp að mér og sagði ofurhljótt og grafalvarlegur.: "Djir master Dori. Jor neisjon is in díííp shit. Æ did not ríalæs ðis vas so seríus". Að því mæltu gekk hann niður stigann úr brúnni, hristandi hausinn, muldrandi "Dávnpeid shit. Æ must tell ðe gæs. Nóvon vill belív ðis"  

Niðurgreiðir Detox meðferð

Miðaldurslesskriftar"skilmisingur".

Frekar er það nú pirrandi hvað Tuðarinn telur augun sín vera farin að svíkja sig á köflum,  nú þegar líkamshulstur hans nálgast hálfrar aldar afmælið.  Komið vel  inn í seinni  hálfleik lífshlaupsins samkvæmt allri „statistík“ og ef til vill ekki að undra þó hinir og þessir partar kroppsins séu farnir að haga sér á annan hátt en helst verður á kosið. Nefndi áhyggjur af áætluðum sjóntruflum við Edgardo annan stýrimann um daginn, en hann hló bara og sagði.: "Master Dori, dónt vorrí. Ðis must bí júróvisjón" og hló ógurlega. Tuðarinn þarf svosem ekkert að kvarta stórum, þannig lagað séð. Pípulögnin í góðu standi og hægðir nokkuð reglulegar og vel formaðar enn sem komið, þrátt fyrir æði misjafnt mataræði hér hinum megin á jarðkringlunni. Almennt ástand semsagt nokkuð gott, miðað við aldur. Undanfarið hefur hins vegar hver fyrirsögnin af annari ásamt texta sem fyrir augu ber á hinum svokölluðu netmiðlum, skolast illilega til við lesturinn og orðið að einhverju tómu rugli sem ekkert vit er í. Þetta hefur fengið Tuðarann til að efast á köflum um áræðanleika augna sinna og hæfileika heilans til ráða úr þessu pári sem fyrir augun ber. Um daginn las ég til dæmis  „Ekki pláss fyrir fleiri rúm“ á mbl.is og var þetta haft eftir forseta Ísraels. Skildi í fyrstu ekkert í kallinum að vera að bulla um þetta, en sá síðan að það stóð ekki rúm heldur múrar og þá fyrst kveikti Tuðarinn á perunni.  Las einnig  að allir „frengju“ frítt á leik í fótbolta og hugsaði með mér að þetta væri enn ein skynvillan. Sá síðan að þetta var nú bara prentvilla og hafði akkúrat ekkert að gera með augun í mér. „Við urðum ekkert VAR við þetta“ var haft eftir júróliðinu í Moskvu á Vísi.is  einn daginn og svona væri hægt að telja alveg út í það óendanlega. Þegar maður hefur lesið allan þennan ótölulega fjölda fyrirsagna á netmiðlunum, sem eru annað hvort fáránlega orðaðar eða beinlínis kolrangar, er ekki að undra að maður fari að lesa og skrifa allt kolvitlaust sjálfur, kominn á þennan aldur. Í dag var ég til dæmis að senda hamingjuóskir til  vinar, norðan megin Borgarfjarðarbrúar, vegna nýfengins titils liðsins hans í knattspyrnu og var áður en ég vissi búinn að skrifa „til hamingju með titlinginn“.  Hann hefði aldrei talað við mig aftur, ef ég hefði ekki náð að leiðrétta þetta rétt áður en ég ýtti á "senda". Það er alveg klárt mál. Það eru svona smáglöp sem ég er farinn að óttast að muni koma manni í vandræði einhvern daginn. Ef til vill eru það ekki augun sem eru að svíkja, eftir allt saman, heldur lestur á illa skrifuðu máli.  Það er nefnilega  orðið þannig með málfar og stafsetningu á netmiðlum að það er nánast „full time job“ að marglesa allan fjárann sem fyrir augu ber.  Það er engin leið að vita lengur hvort það eru elliglöpum um að kenna, eða ömurlegu metnaðarleysi þeirra sem rita fréttirnar, að hver fyrirsögnin af annari verður að tómri steypu hjá manni. Aumingjum eins og mér fyrirgefast einstaka prentvillur og orðagjálfur, en atvinnufólki í fréttaflutningi eru takmörk sett. Mætti halda að leikskólabörn í starfskynningu skrifuðu sumar  fréttirnar og prófarkalesararnir væru ýmist  sofandi, sauðdrukknir eða búið að reka þá alla. Held svei mér þá barasta að sé ekkert að augunum í mér, en ætla samt að láta athuga þau til vonar og vara þegar ég kem aftur heim til kreppulandsins góða, þar sem vinstri sinnar ráða nú ríkjum og sól og sumar leikur um íbúana.