Útskýring á auðskildum fjárflækjuviðskiptum fyrir almenning.

Bull Group hefur keypt allt hlutafé í Tjarnarhólma ehf, sem á talsverðan hlut í Byggingamiðstöðinni. Bringusund ehf átti verulegan hlut í Tjarnarhólma, Kommon ehf átti lítilsháttar og Göngustafir ehf átti svipað í Tjarnarhólma en Bull group átti fyrir hér um bil helming í Tjarnarhólma. Í síðustu viku keypti Skrítnir umtalsvert í Byggingamiðstöðinni af nokkrum helstu hluthöfunum í félaginu, þar á meðal þeim sem mest áttu. Þá kom fram í tilkynningu frá Skrítni til kauphallar BMX á Íslandi að bankinn hyggðist selja alla gommuna til hóps fjárflækja og væru viðræður þegar hafnar. Bull Group hefur selt Sólon ehf hrikalega marga hluti í Bull Group á uppsprengdu verði, en salan er liður í uppgjöri á kaupum í hlutafé Tjarnarhólma ehf. Göngustafir og Kommon eiga hlutaféð í Sólon að jöfnu. Steini stuð er eigandi Göngustafa og Maggi Batman er eigandi Kommon ehf. Maggi Batman er stýrimaður Kommon ehf. Beikon ehf er eigandi milljóna hluta í Bull Group og Matareitrun Invest ehf er eigandi að eitthvað svipuðu í Bull Group. Maggi og Steini eiga síðan þriðjung hvor í Beikon og Matareitrun Invest, samkvæmt tilkynningu.

Þar með er lokið einfaldri upplistun á hversdagslegu fjárflækjakjaftæði á BMX markaðnum Íslenska. Við, meðalkvikyndin sitjum eftir gapandi af undrun yfir stórfenglegri snilli þessara fjárflækja allra saman. 

FL Group eignast 37,57% í TM

Hunnebek og GT- Lögbrjótar sem sleppa?

Ef niðurstaðan verður sú að starfsemi þessara fyrirtækja verði ekki stöðvuð, er komið ákveðið fordæmi, sem erfitt getur reynst að bregast við. Að fyrirtæki komist upp með svona lagað og að það "uppgötvist ekki" fyrr en tugir manna liggja slaðasaðir uppá heiðum í bremsulausri rútu, er með hreinum ólíkindum. Með því að sleppa þeim með skrekkinn og loforðum um bætta framkomu er eingöngu verið að kynda undir enn meira svínari. Lögbrotið hefur þegar verið framið og það sem meira er, viðgengist mánuðum saman. Að íslenskir verktakar ,eins og Arnarfell í þessu tilfelli, geti fríað sig allri ábyrgð á sínum undirverktökum, er einnig umhugsunarvert og býður beinlínis upp á þetta. Sinnuleysi og ekki síst doði og ráðleysi hafa einkennt þessi mál. Allir hafa vitað af þessu allan tímann, en enginn gerir neitt. 

Talið að starfsemi Hunnebek og GT verði ekki stöðvuð

SíminnH/F, þriðja kynslóð farsíma og auglýsingar.

Sá auglýsingu frá Símanum í kvöld um möguleika "þriðju kynslóðar farsíma". Var þar gert "létt" grín að síðustu kvöldmáltíð Jesú Krists og lagt út af því að Júdas var ekki mættur í mat. Jesús hringdi í hann úr nýja farsímanum og fékk samband með mynd við Júdas þar sem hann tekur við silfurpeningunum. Ákaflega "sniðugt" og eflaust margir sem hlægja að þessu. Mér var hins vegar ekki skemmt og verð að segja að tuðarahjartað missti úr nokkur slög við að horfa á þetta. Auglýsingin toppuð í lokin með því að halda því fram að Síminn "Breytti gangi sögunnar"? Má vel vera að þetta sé bölvað argasans tuð í gömlum þverhaus, en er ekkert orðið svo mikils sem nokkurs virði lengur, að ekki megi andskotast með það að vild í nafni frjálsrar samkeppni og gróðavonar? Virkilega "flott" hjá Símanum, eða hitt þó heldur. Ekki nóg með að þetta fyrirtæki sem VIÐ áttum, hafi verið selt gróðapungum, heldur haga eigendur sér eins og andskotans fífl í markaðssetningunni. Brynjólfur Bjarnason og co.: Skammist ykkar, ef það fyrirbæri finnst þá lengur í ykkar orðabókum!!   

Samtaka nú, öll sem eitt!!

Hún Þórdís Tinna okkar sem berst við krabbamein er hér með afar sterka færslu sem minnir mig á hversu gott ég hef það og hversu auðveldlega það góða gengi gæti allt verið horfið á morgun.

Sjúkdómar og slys gera ekki boð á undan sér og okkur hættir öllum til að taka heilsuna og öðrum góðum atriðum í lífi okkar sem gefnum.

Í framhaldi af færslunni hennar Þórdísar Tinnu er Gíslína Erlendsdóttir með færslu á blog.central þar sem hún hvetur til þrýstings á stjórnvöld á eftirfarandi hátt:

Ég vil því koma á framfæri hugmynd um þrýsting á stjórnvöld sem er í anda þeirra aðferða sem Amnesty International notar til að þrýsta á stjórnvöld víða um heim í mannréttindamálum.

Hugmyndin er þessi. Á þriðjudaginn fyrir hádegi  milli 10 og 12 sendi allir öryrkjar, aldraðir og aðrir þeir sem vilja taka þátt  tölvupóst á netföng heilbrigðisráðuneytisins og félagsmálaráðuneytisins með meðfylgjandi  texta: ....Ég skora hér með á íslensk stjórnvöld að leiðrétta þegar í stað kjör öryrkja og aldraðra til samræmis við íslenskan veruleika.... (hugmynd að texta).....undirskrifað af viðkomandi með kennitölu.

Ég tek undir afar góða hugmynd Gíslínu og hvet ykkur öll hér á blogginu til að setja inn færslu um málið og/eða senda tölvupóst. Einnig held ég að það væri góð hugmynd að þeir bloggarar sem senda tölvupóst á þriðjudagsmorguninn setji í hann link inn á sína bloggfærslu um málið sem og link inn á færsluna hennar Þórdísar Tinnu.

 Póstfang félagsmálaráðuneytis er  [e-mail] og hjá heilbrigðis- og tryggingarráðuneyti er það [e-mail] og Guðlaugur Þór heilbrigðisráðherra [e-mail]

Kommmmma sooooo krakkar. Verum fyrirmyndir. Setjum strax inn bloggfærslur og stillum gsm símana og látum þá minna okkur á kl. 10 á þriðjudagsmorgunn. Það er svo auðvelt að gleyma í amstri dagsins og ekki viljum við missa af mómentinu.

Að sleppa fiski.

Upplifði notalegt atvik í laxveiðitúr sem er nýlokið. Setti í fisk, sem ég fann strax að var vel við vöxt og tók hressilega á. Stöngin eins og u í laginu og um að gera að að fara að öllu með gát. Meðan á viðureigninni stóð, tuðaði ég að sjálfsögðu út í eitt við sjálfan mig og var með það alveg á hreinu, um miðja viðureign, að ég myndi aldrei ná að landa þessum væna fiski. Tók síðan loforð af sjálfum mér um það, að ef hann næðist að landi og væri óskaddaður, myndi honum verða gefið líf. Var reyndar búinn að missa fjóra fiska og farið að langa að koma í hús með einhvern afla, en ákvað þrátt fyrir það að standa við að sleppa fiskinum. Eftir rúmlega hálftíma viðureign náðist loks að draga laxinn að landi og fyrir framan mig lá þessi gullfallega hrygna. Sjö kíló var hún og kviðurinn þaninn af hrognum. Flugan datt úr munni hennar um leið og hún var komin á land og ekki varla hægt að sjá nokkuð á henni. Eftir að hafa mælt lengd og þyngd, var komið að því að efna loforðið. Í nokkrar mínútur var hrygnunni haldið upp í strauminn og smátt og smátt hjarnaði hún við og tók að lokum hressilegan sprett úr greipum mér. Það var dálítið undarlegt en jafnframt notalegt að horfa á eftir henni. Nokkuð sem ég hef ekki gert áður og ekki laust við að örlítið stolt gerði vart við sig. Veiðifélagarnir áttu varla orð, en ég er sáttur í sálinni og ákveðinn í því að endurtaka leikinn í næstu veiðiferð, sama hvað hver tautar og raular. Náði síðan að landa tveimur fiskum til viðbótar, sem voru mun minni og þeir eru komnir í frystikistuna blessaðir.    

Fuglabjarg við Reykjanesbraut?

Vegarspottinn milli Nónhæðar og Vífilstaða á Reykjanesbraut er undarlegt mannvirki. Þar er risin einhver sú rosalegasta hljóðmön eða gryfja sem sést hefur á Íslandi og þó víðar væri leitað. Grjóthlaðinn veggur sem vírnetsgirðing heldur við og hafa þar verkamenn verið að spranga að undanförnu, sem í Látrabjargi væru. Kæmi ekki á óvart að bjargfuglar tækju sér bólfestu og verptu þarna næsta sumar. Svakalegur veggur  og ljóst að loka verður vel meðfram honum að ofanverðu ef menn og málleysingjar eiga ekki að eiga á hættu að hrapa til bana. Milli akreinanna er síðan moldarhaugur mikill sem er sennilega vel á fjórða meter að hæð, sem nýverið hefur verið sáð grasfræi í. Loks er trégirðing mikil sem kórónar þennan óskapnað, sem sennilega er ætlað að minnka hljóðmengun hjá íbúunum sem búa í Bæjargili og öðrum götum neðan Reykjanesbrautarinnar. Niðurgrafinn vegarkafli á einni fjölförnustu götu höfuðborgarsvæðisins!Glæsilegt, eða hitt þá heldur. Er búið að banna skafrenning og snjókomu á Íslandi eða eru verkfræðingarnir sem hönnuðu þennan óskapnað, eða þeir sem bera ábyrgð á þessu ekki með öllum mjalla? Undarlegur andskoti, þetta að þurfa sífellt að klippa bæjarfélög í tvennt með hraðbrautum, að ekki sé nú talað um með þessum hætti sem þarna er gert. Hefur enginn heyrt um stokka sem nota má í stað þessarar endaleysu? Stokkur fyrir umferðina var reyndar eitthvað í umræðunni, áður en framkvæmdir hófust á þessum vegarkafla, en þetta varð niðurstaðan. Ekki einasta að þetta sé ljótara en orð fá lýst, heldur er þetta svo vitlaust að engu tali tekur. Ég fer þessa leið tvisvar á dag og tuða út í eitt við sjálfan mig vegna þessara framkvæmda og því hve fáránlegt þetta er. Vandséð orðið hvort meiri þörf er fyrir þurrkur að innan eða utan á framrúðunni hjá mér og verður fróðlegt að sjá hvernig þessi snjókista kemur til með að stuðla að öruggari samgöngum. Þvílík og önnur eins endaleysa! Annar vegarkafli sem er lýsandi dæmi um fáránlega framkvæmd er kaflinn sem liggur frá Essóstöðinni í Hafnarfirði og gegnum holtið í átt að Keflavík. Sennilega eitt besta byggingarland í Hafnarfirði tekið undir hraðbraut og hálf hæðin sprengd í tætlur til að koma þar fyrir mislægum gatnamótum. Að setja holu í gegn? Nei ekki aldeilis á dagskránni. Hundruðir lóða fyrir bý, svo aka megi undir berum himni. Það er ekki öll vitleysan eins í vegagerð og ferlegt að þurfa að tuða um þetta, en mátti til.        

Bakkafjöruhöfn-feigðarflan?

Verður ný höfn í Bakkafjöru bara ekki til þess að æ færri skip komi til Vestmannaeyja og þar með dragi enn frekar úr umsvifum í bæjarfélaginu? Þokkalegar mótvægisaðgerðir það, eða hitt þó heldur! Á kannski að banna öðrum skipum en ferjunni að nota aðstöðuna?Hefur bæjarstjórnin og þeir sem fylgjandi eru þessari Bakkafjörulausn eitthvað spáð í þann vinkil? Það er hverjum manni ljóst sem eitthvað þekkir til á Bakkafjörusvæðinu og reyndar með öllum söndunum sunnanlands, að hafnargerð á þessu svæði er ekki einfalt mál og kostnaðurinn verður gríðarlegur. Persónulega tel ég þetta feigðarflan og nær að bæta þjónustuna með öðrum hætti. Nýjan Herjólf eða fleiri ferðir ( sem reyndar er alveg með ólíkindum að þurfi að vera að pexa um, svo sjálfsagt sem það er)    

Vilja að framkvæmdum við ferjuhöfn í Bakkafjöru verði flýtt

Djöfulsins bömmer að vera kona á Íslandi

"Haustið 2002 leitaði 19 ára stúlka til neyðarmóttöku á Landsspítalanum vegna nauðgunar. Hún hafði vaknað heima hjá ókunnugum manni eftir ferð á bar með vinafólki og mundi ekkert eftir atburðarás næturinnar. (Flunitrazepam?) Stúlkan var með áverka á kynfærum sem voru það miklir að hún þurfti að fara í lýtaaðgerð. "Ekki var talin sönnun fyrir brotinu og ríkissaksóknari gaf ekki út ákæru. Hann ákærði heldur ekki fyrir líkamsárás sem er refsiverð þótt afleiðingarnar verði bara metnar árásarmanni til gáleysis."

Hvað er málið? Nefbrot hefði verið kært.

Og hvað eigum við lengi að þola að Flunitrazepam sé fáanlegt á Íslandi þrátt fyrir að sýnt sé að það sé til fullt af lyfjum sem geta leyst það af hólmi.

 Lít svo á að Guðlaugur heilbrigðisráðherra eigi næsta leik. Gengur lítið hjá hans undirsátum að koma þessari ólyfjan af markaðnum.

Reykingabann-Einkasamkvæmi lausnin??

 Það er ef til vill að bera í bakkafullan lækinn að fara að tuða um reykingabannið fræga, en get ekki á mér setið lengur.

 Reykingar eru óhollar. Það er hverjum manni ljóst. Nú hafa þær verið bannaðar mjög víða og ekkert nema gott svosem um það að segja, nema hvað mörgum þeim sem reykja ( þar á meðal mér) finnst sem fulllangt sé gengið í upprætingunni á þessum ósið. Forsjárhyggjan alger og ekki boðið uppá neitt val um eitt eða neitt, er reykingar eru annars vegar. Út á götu með hyskið og látum það hýrast þar eins og fávita í öllum veðrum, meðan puritanarnir og “hagstæða” fallega fólkið sem aldrei gerir neitt sem er óhollt og er svo heilbrigt og gallalaust, situr inni á börum og skemmtistöðum, í svitalyktinni lepur sitt “holla” vín og öl og gerir góðlátlegt grín að þessum aumingjum sem úti standa.  Í einfeldni minni fæ ég ekki skilið hvers vegna ekki má hafa  bari eða skemmtistaði þar sem má reykja. Þeir sem ekki reykja færu þá á þá staði sem ekki er reykt á. Þeir sem ynnu á reykstöðum vissu af því að þeir væru að vinna á reykstað og þeir sem ekki vildu vinna á reykstað ynnu á reyklausum stöðum. Er þetta eitthvað flókið? Þarf að handstýra öllu með boðum og bönnum? Hvað um að hafa val um hluti? Á bara að slá það út af borðinu? Hvar verður gripið niður næst? Ég veit að reykingar eru óhollar, en það er svo margt annað sem er það líka. Skil alveg rökin hjá þeim sem ekki reykja, að vilja vera á reyklausum stöðum. Það er bara akkúrat ekkert að því og  hið besta mál. En að valta svona yfir okkur reykingafólkið, finnst mér andskoti skítt. Hræddur um að margar ölstofur og veitingahús fari á höfuðið eftir komandi vetur. Þó ég reyki, ætla ég ekki að fara að norpa utan við ölstofu niðri í bæ ef mig langar í öl og smók. Þá drekkur maður frekar sitt öl eða vín heima hjá sér, þar sem enn sem komið er, fæ ég einhverju ráðið. Þar sem reykingabannið á við alla opinbera staði og samkomur, legg ég til að reykingamenn haldi lokuð einkasamkvæmi á ölstofum borgarinnar í vetur meðan illa viðrar, þar sem ekki er hægt að fetta fingur út í það samkvæmt laganna hljóðan, eða hvað? Spyr sá sem ekki veit. Leiðréttið mig endilega ef þetta er rangt túlkað, en í guðs bænum, ekki fara að romsa eða raupa um óhollustu eða tillitssemi gangvart þeim sem ekki reykja. Ég er alveg búinn að fá upp í berkjur af því að hlusta á það. Læt þessu tuði lokið að sinni og farinn í smók.

    

Að hafa vit á, eða skoðun á....

Það er ætíð lofsvert þegar hinum almenna borgara og meðaljóni er boðið að taka þátt í umræðum á mannamáli, sem með öðrum orðum krefjast ekki tæknilegrar tjáningar eða 100 % þekkingar á öllu er varðar viðfangsefnið. Að bjóða til umræðu með opinn huga, þar sem allir geta sagt hvað þeim finnist, án þess að verða kaffærður í tæknitali eða samanburði við hina og þessa "isma" í öllum fjáranum, er lofsvert framtak og gott fordæmi. Nokkuð sem bæjar og borgarfulltrúar mættu gjarnan taka sér til fyrirmyndar. Byggingalist eða listleysi, er nokkuð sem flest okkar hafa fyrir augum alla daga og eflaust gaman að geta rætt arkitektúrinn á opinn hátt og á léttum nótum.   

Hafa allir vit á arkitektúr?