Niðurlæging í útlöndum.

Tuðarinn er nýkominn aftur til landsins eftir hátt í sjötíu daga fjarveru á hjara veraldar. Ferðalagið heim var bæði langt og strangt. Eftir tæplega fimmtán tíma flug frá Buenos Aires til London, var kvikyndið tekið í "Rutine Check" af yfirvöldum á ömurlegasta flugvelli veraldar, Heathrow. Niðurlægingin og skömmin sem ég mátti þola var slík að það var varla orðinn einn einasti fersentímeter á kroppnum, sem ekki bogaði af sviti. Var "pikkaður" úr röðinni eftir vegabréfaeftirlitið og látinn setja töskurnar á langt spegilgljáandi ryðfrítt stálborð og látinn opna þar handtöskuna, auk þess sem embættismaður hennar hátignar skar með hníf plastfilmuna utan af stærri töskunni, svo hægt væri að opna hana. Töskuna nota ég sennilega ekki aftur, þar sem hnífsegg embættismannsins risti hana svo illa. Ekki var farið afsíðis með mig, heldur fór þetta allt saman fram fyrir framan farþega sem gengu hjá í hópum og hafa sennilega álitið mig stórhættulegan terrorista sem verið væri að taka á teppið. Hver einasta spjör rifin upp úr töskunum, bæði skítugar og hreinar, auk þess sem breitt var úr skjölum og pappírum eftir endilöngu borðinu. Þar lágu áður en yfir lauk, trúnaðarskjöl og skýrslur innan um skítugar nærbuxur og illa lyktandi sokka. Embættismaðurinn lét sem hann hefði handsamað Osama Bin Laden og bókstaflega tætti í sig farangurinn, auk þess sem hann kallaði til fíkniefnahundaliðið og lét fartölvuna á gólfið með tómri handtöskunni svo hundurinn gæti þefað af herlegheitunum. Meðan á þessu gekk, gengu farþega framhjá okkur sem "eftirlitsmaðurinn" rak áfram með hrópum og köllum eins og algera vanvita. Hvað gerir maður annars þegar framan við mann liggur fartölva og ferðataska, annað en að hægja á sér og kanna málið? Skoða illmennið sem verið er að "bösta" og renna augunum yfir farangur hans sem ligggur eins og nýlistarverk eftir endilöngu spegilfægðu stálborðinu? Eftir því sem betur varð ljóst að saklaus sál ofan af Íslandi, hafði ekkert vafasamt meðferðis, var eins og embættismaðurinn gerðist enn staðráðnari í að auka á niðurlæginguna. Háværar spurningar um allt og ekkert og alls kyns bendingar og líkamstjáning þessa valdsins manns urðu á köflum slíkar, að Tuðarinn beið bara eftir því að verða járnaður af sérsveitarmönnum og snúinn í gólfið. Það gerðist þó ekki og hraðar en maður hnerrar, var sagt "you can go" og eftir stóð ég eins og ég veit ekki hvað við borðið, með allan farangurinn og mátti gjöra svo vel að pakka honum einn og í smærri hópum. Leið eins og ég hefði orðið fyrir eldingu. Sópaði saman spjörunum og ætlaði að moka þeim í töskurnar, en þá voru þær allt í einu ekki nógu stórar, altso töskurnar. Mundi þá að þegar ég pakkaði, var hver einasti ferrúmsentímeter þaulskipulagður og öllu raðað í röð og reglu. Fékk skyndilega nóg, henti því sem ekki var talið bráðnauðsynlegt í ruslatunnu, lokaði töskunum, raðaði þeim saman og hélt áfram í sam"floti" með þeim sem runnu framhjá. Gekk gegnum hurð og fram í stóran sal, leitaði að auðu sæti, settist og reyndi að byrgja inni öskrið. Það tókst og eftir klukkustundar"afslöppun" hélt ég áfram göngu minni um þennan ömurelgasta fluvöll veraldar. Þessi andskoti hlýtur að hafa átt reikning hjá ICESAVE hugsaði ég og komst að þeirri niðurstöðu að niðurlæging mín væri sennilega tveimur "Úlfum" að kenna, ásamt fólki af svipuðu kaliberi. Andskotinn bara að þurfa að vera íslendingur þessa dagana og ferðast um heiminn. 

Súpuþjófsdómsviðmið?

Það er ólíklegt annað en að einhver eða einhverjir hljóti dóma í uppgjöri efnahagshrunsins. Hver eða hverjir það verða mun tíminn leiða í ljós. Tuðarinn vill leggja til við dómstóla landsins að við ákvörðun refsinga sem þessu munu fylgja, verði tekið mið af dómi yfir manni sem stal súpu og hefur nýlega hafið átta mánaða afplánun í fangelsi fyrir vikið. Súpan getur varla hafa kostað meira en 500 - 1000 krónur og því ljóst að dómurinn miðar við um það bil einn mánuð fyrir hverjar hundrað krónur.

Fyrstur til að fá stöðu grunaðs manns

ÞJÓÐSTJÓRN STRAX!

Óskundinn og ruglið sem þessi ríkisstjórn hefur áorkað, á ekki lengri tíma en raun ber vitni, er með hreinum ólíkindum. Yfirlýsing um byggingu nýs Landspítala sem hluta af endurreisn atvinnu og efnahagslífssins á Íslandi, toppar síðan déskotans delluna alla saman og sýnir svo ekki verður um villst að hér stjórnar algerlega óhæft fólk ríkisbúskapnum og endurreisninni, sem nú er nauðsynleg. Varla við öðru að búast af fólki sem í fárviðri efnahagskreppunnar sáu þau verkefni mikilvægust, fyrir utan náttúrulega að halda völdum, að almenningur greiddi fyrir fjárglæfra örfárra þjóðfélagsnýðinga og síðan að moka okkur með góðu eða illu í Brusselflórinn og afsala okkur sjálfráðaréttinum í okkar eigin málum.  Þjóðin er orðin svo blönk að það er varla gert ráð fyrir því í fjárlögum lengur að fólk veikist, slasist, fatlist eldist og já bara jafnvel fæðist lengur, hvað þá að hægt sé að halda uppi lágmarks þjónustu í heilbrigðisgeiranum. Hvurn fjandann á þá eiginlega að gera við nýtt sjúkrahús? Veruleikafyrring Jóku og kúvendingsins úr Þistilfirðinum virðist alger orðin og hafi einhverntíma verið gjá milli þings og þjóðar, þá er það nú um stundir. ÞJÓÐSTJÓRN STRAX! ÞJÓÐSTJÓRN STRAX!    

Nýr Landspítali mun rísa

Undarlegur andskoti!

"Óvíst er hvort gengið verði að persónulegum veðum"!? Hvað í veröldinni er það sem veldur því að einhver minnsti vafi leiki á hvort gengið verði að persónulegum veðum hjá þessum mönnum? Skulda þeir of mikið, eða eiga þeir, þegar öllu er á botninn hvolft, ekki neitt? Ja ljótt er, ef satt er, sem getur eiginlega ekki verið. Ef almenningur þarf í kjölfar hrunsins að horfa uppá "fjárfestingar"glannana sleppa við að standa við skuldbindingar sínar, er hætt við einhversstaðar heyrist hljóð úr horni og allt eins víst að það verði bara bölvuð óhljóð. Fer ekki að koma að því að taka eins og eina, tvær villur og Hummera í pant, svo eitthvað fáist nú upp í allar "snilldarfjárfestingarnar" sem þessir kumpánar hafa verið margrómaðir fyrir af fréttasnápum, Bessastaðafjölmiðlalagfrumvarpsaöxlinni og fleirum? Undarlegur andskoti ef þeir einir sleppa sem allt settu til andskotans, en skríllinn situr eftir með skuldir þeirra, undir járnhæl Þistilfjarðarkommans og Silfurskottunnar.  

Skulda Straumi rúma 9 milljarða króna

Á "Ölþingi" Íslands.

Gárungarnir hafa fundið nýtt nafn á Alþingi Íslands, nefnilega Ölþingi. Kemur það til út af nýlegu rauðvínsblaðri nýs þingmanns SF í umræðunni um Iceslave, en þar steig hann í pontu gegnmareneraður af léttvínsdrykkju og pakksaddur í boði ónefnds banka úti í bæ. Glæsileg byrjun á þingmannsferli, eða hitt þó heldur. Það að menn mæti drukknir í ræðustól á Alþingi virðist hins vegar ekki vera neitt tiltökumál, ef marka má þau orð sem höfð voru eftir forseta þingsins, en hún sagði eitthvað á þá leið að það gæti tekið fólk mislangan tíma að koma sér inn í hlutina á nýjum vinnustað! Af orðum hennar má semsagt ráða að það sé nánast allt í lagi að fá sér í annan fótinn við þingstörfin. Það sem Sigmundur Ernir klikkaði hins vegar á var að hann var aðeins OF fullur. Vonandi að hann verði bara hálfur næst. Þá passar hann fínt inn í þennan hóp amlóða og eiginhagsmunapotara sem nú fylla sali Ölþingis Íslendinga.

Skjaldborgarbrandarinn.

Þessi vesæla ríkisstjórn silfurskottunnar og sósíalíska sveitamannsins úr Þistilfirðinum gefur skít í hvað hinn almenni borgari þarfnast mest í dag. Rúmlega hundrað dagar liðnir af líftíma stjórnarinnar og augljóst að þegar talað var um að slá skjaldborg um heimilin í landinu, var átt við það að halda heimilum og fyrirtækjum landsins utan við allt sem lá mest á að gera að þeirra mati. Ómældu púðri sóað í að nauðga fram aðildarumsókn að Brusselbandalaginu, afsala okkur fullveldinu og skrifa síðan uppá skuldaklafa sem hinn almenni borgari situr uppi með um ókomin ár. Skjaldborg merkir semsagt í huga þessarar stjórnar að halda öllum frá stjórninni, svo þeir sem þar sitja geti haldið völdum og stólum, hvað svosem það kostar þjóðina! Móðuharðindi hin nýju eru að bresta á og það má þakka þessu hugsjónagelda liði, sem nú situr við völd, auk þess sem stór hluti stjórnarandstöðunnar ætti að hundskast til að skammast sín og byðjast í það minnsta afsökunar á því hvernig komið er fyrir þjóðinni og hafa vit á að vera ekki að gjamma í fjölmiðlum með eitthvert yfirklór til varnar gjörðum sínum. Það er með öllu óverjandi hvernig komið er og það er einnig óverjandi hvernig tekið er á vandanum. Sjálfstæðisflokkur, Framsókn og Samfylking heimiliðu kollsteypuna, með aumingjaskap, klíkuplotti og eftirlitsleysi, árum saman. Samfylking og Vinstri-Hægri-út og Suður grænir reka síðan síðasta naglann í líkkistuna með gjörningum sínum þessa dagana. Þvílíkt og annað eins ráðleysis og dusilmenna og kvennalið sem við höfum kosið yfir okkur.  ÞJÓÐSTJÓRN STRAX! ÞJÓÐSTJÓRN STRAX! ÞJÓÐSTJ'ORN STRAX!

ASÍ: Bregðast þarf við vanda heimilanna

Bónus fyrir líkið?

Að þeir sem áttu þátt í að skapa það hrun sem nú er staðreynd, skuli voga sér að fara fram á bónusa við að endurheimta einhvern hluta af hræinu sem þeir sköpuðu sjálfir, er hreint með ólíkindum. Enn hefur ekki svo mikið sem einn einasti þessara "fjármálasnillinga alheimsins" stigið fram og beðist afsökunar. Afsökun er án efa ekki eins flókin og eignaundanskot, krosstengsl, aflandsreikningar og leyndarfyrirtæki í skattaskjólum þessara óreiðupésa, sem víluðu ekki fyrir sér að setja hér allt á höfuðið. Afsökun kostar ekki neitt, hvað svo sem stolt þessara manna eða lögfræðingar þeirra segja. Eftir það sem á undan er gengið kemst maður ekki hjá því að draga þá ályktun að einhverjir þessara manna ættu heima í fangelsi, svo mikill er viðbjóðurinn sem dreginn er upp úr skít þeirra þessa dagana. Að verðlauna þá síðan með bónusum og bara að taka það í mál að þeir komi nálægt rekstrinum áfram, er eitthvað sem einföld sál á hinum enda veraldarinnar skilur ekki. Biðst ég hér með afsökunar á því. 

Stjórnendur vilja milljarða í bónus

Vorið, Icesave og Edgardo.

Það er farið að vora hér hinum megin á hnettinum. Reyndar var suðvestan stormur, snjókoma og tveggja stiga frost í síðustu viku, en frá því um helgi hefur ekki gert eitt einasta stórviðri og það sem meira er, veðrið er barasta búið að vera mjög gott, fyrir utan smá hlýjindaskot af norðaustri í gær, með 30 metrum á sekúndu um tíma, en það telst nú bara frískur andvari hér um slóðir, þar sem hægt er með góðu að segja, að sé eitthvert hið mesta veðravíti á jörðinni.  Norðlægar áttir færa okkur hlýjindi, enda Tuðarinn staddur langleiðina suður undir Suðurskauti á ný. Einungis eru um sex hundruð sjómílur í nyrsta odda Antarcticu, þaðan sem við erum staddir núna við veiðar. Búnir að fara að Cape Horn, en komnir aftur austur um og erum nú um 350 sjómílur suðsuðvestur úr Malvinas Eyjum( Nefni þær aldrei enska nafninu, enda eiga bretaskrattarnir ekkert með það, að eigna sér eyjar og sker tvist og bast um heiminn). Fyrstu dagar veiðiferðarinnar voru býsna spennandi, meðan þess var gætt  hvort einhver af tæplega áttatíu manna áhöfn, hefði laumað með sér svínaflensu. Nú er ljóst að svo var ekki og skipið því sóttfrítt með öllu, af svínaflensu í það minnsta. Það verður að teljast býsna gott, því hér um borð eru allra þjóða kvikyndi og stórvinur minn, Edgardo annar stýrimaður, sem tekið hefur hverja einustu pest sem frést hefur af, nema svínaflensu. Þar setur þessi öðlingur strikið. Þar fer maður með mikið sjálfs“respekt“ sem leggur ekki nafn sitt við svín, jafnvel þó um flensu sé að ræða. Undanfarna daga hefur talsverður tími farið í að útskýra fyrir Edgardo allt þetta brambolt heima á Íslandi varðandi „Icesave“ og verður að segjast eins og er, að það er ekki létt verk að koma honum í skilning um þetta hörmulega mál.  Reyndar er manngreyið alveg hreint gáttað á svo mörgu heima á Íslandi, að það væri efni í heila bók að segja frá því og þá ekki síst lausnunum sem hann á við öllum heimsins vandamálum, Íslenskum meðtöldum.  Reyndar varð hann algerlega kjaftstopp þegar Tuðarinn reyndi að útskýra fyrir honum að nú stæði jafnvel til að verkalýðsfélög á Íslandi færu að niðurgreiða stólpípumeðferðir félagsmanna í þar til gerðum afeitrunarbúðum og held svei mér að hann eigi enn talsvert í land með að skilja hvaða endemis rugl ég var að segja honum, en það er nú önnur saga.  Þessa stundina er það „Icesave“.: „Master Dori. Jú sei ðis is killing jor ekonomí“?  „Jes Edgardo bíkos  of Æseif, ðe ekonomí and oll ðe banks are kaput“. „Master Dori. Æ dónt önderstend. Æ seif tú, böt mæ bank is still ókei. Há kan ðis happen? Did jú seif tú muts“?  Það eru langir dagar framundan og mikið spjall í vændum. Það er nokkuð ljóst. 

Bestu kveðjur að sunnan.

Samhengi hlutanna.

Allur íslenski fiskveiðiflotinn aflaði tæpra einna komma þriggja milljóna tonna í fyrra. Afraksturinn í krónum talið níutíu og níu milljarðar. Þegar þessar tölur eru settar í samhengi við þær tölur sem bylja á þjóðinni dag hvern, varðandi bankahrun og viðbjóðslega landráðagjörninga, er varla hægt annað en að doka aðeins við. Hér er nefnilega komin ágætis viðmiðunartala fyrir almenning, til að vega og meta gengdarlaust græðgis og eyðslubrjálæði örfárra einstaklinga sem sannanlega eiga hvað mestan þátt í að knésetja hagkerfi þjóðarinnar og samlanda sína um leið. Níutíu og níu milljarðar króna hljóma nánast eins og skiptimynt ef borið er saman við kröfur í banka og alls kyns þrotabú útrásar"sýkinganna" sem nú eru hvert af öðru ýmist komin í þrot, eða á góðri leið með það. Tæpir eitt hundrað milljarðar góðir landsmenn, er afrakstur alls íslenska flotans á einu ári. Næst þegar milljarða, trilljarða, skrilljarða upphæðir verða nefndar, varðandi hrunið á Íslandi, er ekki úr vegi að hafa þetta hugfast.

Kveðja frá Argentínu.

   

Aflaverðmæti nam 99 milljörðum

Heimskuleg umfjöllun.

Það er undarlegur andskoti, að á meðan þjóðina þyrstir í upplýsingar um stöðu sína og hvert stefni, sé svona djöfulsins della borin á torg og talin til markverðra tíðinda. Gera nú nógu marga "parónojaða" og skelkaða og tyggja svo á bölvaðri dellunni í heila viku, eða meir. Nákvæmlega það sem við þurfum á að halda! Heimur versnandi fer og fjölmiðlar á Íslandi þar fremstir í flokki. Frussss..... 

Spurt um jarðskjálftaspádóm