Fólskuleg flamingóárás!-Gleðilegt ár.

 (Smella á mynd til að skoða)

Sá fáheyrði atburður átti sér stað hér um borð, lengst suður í höfum í gær, að Flamingó skeit í augað á Tuðaranum!  Já takk fyrir, skeit beint í augað á mér og reyndar yfir hnappinn á mér allan, en vinstra augað varð sýnu verst úti úr þessari fólskulegu árás. Það er ekki eins og að verða fyrir Maríerludriti að fá þessa glommu yfir sig, það get ég sagt ykkur.  Flamingói er eins og þið vitið, stór skærbleikur fugl með fáránlega langar lappir og gogg sem stendur fram úr andliti hans en snýr síðan við hálfa leiðina til baka aftur uppí hann. Fugl sem maður sér yfirleitt í dýralífsmyndum frá heitum löndum, en ekki hafssvæðum eins og því sem ég er nú staddur á, aðeins spölkorn frá Antarktiku. Hér voru jú slydduél í fyrrakvöld og búið að vera skítaveður dögum saman og hitinn ekki farið yfir fjögur stig. Þetta hljómar mjög undarlega, ég veit það, en þetta var ekki draumur og þetta var alvöru flamingó! Sem betur fer var Tuðarinn við annan mann í brúnni, þannig að það er vitni að árásinni, auk þess sem áhafnarmeðlimir fjölmenntu á stjórnpall að henni lokinni til að virða fyrir sér hollinguna á íslendingnum sem óð út á brúarvæng til að ná myndum af fuglunum, sem voru reyndar tveir. Ég náði myndum af flammafjöndunum, sem betur fer, en var rétt búinn að smella af þeirri síðustu þegar höggið kom. Vissi fyrst ekki hvaðan á mig stóð veðrið, en það stóð náttúrulega bara beint í fangið á mér að sjálfsögðu og því fór sem fór. Eitt stykki flamengodella beint í fésið. Gríðarlegur sviði í vinstra auga og skyndilegt sjónhvarf fékk mig til að garga, veina og baða út öllum öngum. Sá ekki neitt, gekk á hurðina og hruflaðist á hné og sköflungi í dyrakarminum, missti jafnvægið og datt kylliflatur inn á brúargólf og myndavélin flaug út í horn. Edgardo stýrimaður gargaði náttúrulega úr hlátri, en mér var ekki skemmt. Skreiddist á fætur og haltraði að vaskinum til að skola framan úr mér. Þvílíkt magn! Er ég leit í spegilinn sprakk ég hins vegar úr hlátri, enda ekki annað hægt. Það var engu líkara en ég hefði lent í Helga Hóseassyni eða orðið fyrir „paintball“ bolta. Hægra augað slapp nánast alveg við sendinguna, enda myndavélin til varnar þeim megin, en allt andlitið, hárið og skyrtan ein skítaklessa. Hefði tekið mynd af þessu líka, en sökum skítlegs ástands myndavélagarmsins reyndist það ekki unnt. Hjúkrunarfræðingurinn var kallaður út til augnþrifa og bjó um augað að þrifum loknum með myndarlegum augnlepp auk þess að plástra sköflunginn, sem hruflaðist illa við brotlendinguna inn á brúargólf. Þakka bara fyrir að þetta fer ekki í neinar opinberar sjúkraskýrslur, og þó. Ætli séu margir sem geti státað af því að flamengo fugl hafi skitið í augað á þeim suður undir Suðurpól? Held ekki. Best að bæta þessu á afrekalistann. Það verður eineygður og haltur Tuðari, með skítabragð í munni, sem kveður árið 2008 og heilsar árinu 2009 með sól í hjarta og fuglaskít í hárinu.Bestu óskir um gleðilegt ár og þakkir fyrir það sem er að líða, sendi ég öllum sem ég unni og þekki. Smjúts á línuna, sprengið ykkur ekki í tætlur á gamlárskvöld og munið að kveikja á stjörnuljósi fyrir Tuðarann.Kveðja úr suðurhöfum.       

Athugasemdir

[Anna Einarsdóttir, 31.12.2008 kl. 15:51]

  Frábærir fuglar þessir flamingófuglar.  Gefa bara skít í allt tuð.  Mikið hefði ég verið til í að sjá herlegheitin;  Halldór og flammaskítinn. 

Gleðilegt ár Halldór og allir um borð. 

[Hrönn Sigurðardóttir, 31.12.2008 kl. 16:00]

Þeir hafa náttúrulega vilja borgað til baka smellina! Gott samt að þú dast inn á brúargólfið en ekki út fyrir vænginn eða hvað þetta nú heitir á skipum.....

Gleðilegt ár Halldór yfirtuðs og skilaðu kveðju til Pablos og segðu honum að við hlæjum líka. 

[Brattur, 31.12.2008 kl. 17:09]

... er ekki eitthvað til sem heitir Flamingó dans hu?... það hefur verið sá dans sem þú dansaðir þarna karlinn... með leppa fyrir augað... ertu þá ekki orðin alvöru sjóræningi? sá fyrsti sem ég þekki í þeirri grein...

Gleðilegt ár, bið að heilsa mörgæsunum.

[Hrönn Sigurðardóttir, 1.1.2009 kl. 19:36]

Nei sko - komin mynd af árásaraðilanum?

Ferlega virðist hann ekki eiga heima yfir þessum kuldalega sjó, samt svona suðurhafseyjafugl......

[Fanney Björg Karlsdóttir, 3.1.2009 kl. 02:19]

ahahaha.... þarna hefði ég viljað vera dauð fluga á vegg.... tja kanski ekki alveg dauð... en allavega hefði ég látið lítið fyrir mér fara.....en það verður ekki á allt kosið hér í heimi......

Gleðilegt ár kæri Tuðari.... og takk fyrir skemmtileg kynni hér í bloggheimum....