"Kolefnisjöfnuð íþróttamót"??

"Alþjóðleg íþróttamót yrðu kolefnisjöfnuð með markvissum aðgerðum þannig að mengunaráhrif þeirra yrðu hverfandi." Halló, þarf ekki eitthvað að útskýra þetta betur, eða er ég svona illa gefinn að ég átta mig ekki alveg á hvað verið er að leggja til? Er reiknað með því að allir fái svona heiftarlega í magann á íþróttamótum eða hvað? Sennilega er ég bara illa gefinn, en þetta er einhver fáránlegasta setning sem ég hef lesið í langan tíma. Vænti þess að nánari útlistun á þessari framkvæmd verði gerð nánari skil fljótlega. Ef til vill bara lýsandi dæmi um tilgangsleysi ferðarinnar, en það er annað mál. 

Sótti samráðsfund leiðtoga evrópskra smáríkja

Hættulegar rak"vélar".

Mach 2, síðan mach 3 og nú er svo komið að tæpast er hægt að fá annað en mach 5! Semsagt fimm blaða rak"vél". Gott ef ekki var bryddað uppá að kalla þetta "Túrbó" rakstur  á einhverjum tímapunkti. Jafnvel hægt að fá þessi ósköp með rafhlöðu sem "víbraði" raksturinn. Er einn af þessum íhaldssömu tuðurum sem héldu að tvöfalda rak"vélin" væri toppurinn og fannst að jafnvel þrjú blöð væru "over the edge". Er svolítið gjarn á að "fresta" rakstri fram að því að ekki verði lengur undan því  skorist að  raka sig og vil þá bara skafa lýjuna af með sem minnstri fyrirhöfn. Lenti í meiri háttar "krísu" í dag með "Mach 5". Andlitið fullloðið(Enn eitt orðið með þremur ellum) og hugðist skafa hýjunginn af í hvelli. Ekkert annað tól tiltækt en "Mach 5" og afraksturinn eftir því. Stend hér eins og fáviti með rak"vélina" fasta í andlitinu og veit hreinlega ekki hvern árann ég á að gera. Þegar fimm rakblöð eru sett í eina "sköfu" er svo stutt á milli þeirra að ekki er pláss fyrir þriggja daga skegg eða meira. Alblóðugur hef ég sett mér það markmið að kaupa upp alla gamla lagera af "venjulegum" rakvélablöðum. Indland og Rússland verða sennilega fyrst fyrir valinu og síðan tek ég Asíu eins og hún leggur sig.Hef fín sambönd þar víða. Hefur einhver hugsað út í það hvernig er að raka sig með fleiri blöðum en fimm?

P.s. Vél er eitthvað sem snýst. "Rakvél" Jæja, ég geri ekki annað en að tuða. 

Umhverfisslys af verstu gerð.

Þetta blessaða Skuggahverfi er ekkert annað en umhvefisslys af verstu gerð. Að girða strandlengjuna af með þessum turnum og byggja síðan lágreistari hús upp í brekkuna er einhvern veginn svo fáránlega vitlaus forgangsröðun að leitun er að öðru eins. Hverfið getur vel orðið glæsilegt, en undarleg að láta hæstu byggingarnar byrgja allt útsýni í þeim húsum sem ofar standa. Hverfið greinilega hannað með það fyrir augum að ekki verði þar nein börn, sem er svosem allt í góðu, en skelfing held ég að það eigi eftir að bera nafn með réttu. Skuggahverfi verður þetta, svo mikið er víst. 

Sala að hefjast á nýjum íbúðum í Skuggahverfi

Gargandi spenna!

„Hann hefur ekki verið svona hrifinn af stelpu mjög lengi og þau gera allt sem venjuleg pör gera, til dæmis að fara í bíó eða horfa á DVD," Þvílík frétt!! Maður getur varla beðið eftir nánari fréttum af blessuðum drengnum og nýju vinkonunni! Please, please, please kæri Moggi. Ég treysti því að vel verði fylgst með þessu máli og hvernig það þróast næstu daga og vikur. Það hlýtur að teljast til meiriháttar viðburða í þessu "selebrity" kjaftæði að utan, að meðal þess skuli finnast fólk sem gerir það sem venjulegt fólk gerir. Rosalegt, svakalegt og efni í kjaftadálka alla leið upp til Íslands. Get varla beðið eftir meiru.......ég er svo spenntur að fá að lesa meira um fólk sem hagar sér eins og annað fólk að ....bara....bara...ja, ég bara er alveg að springa úr eftirvæntingu! 

Robbie með nýja kærustu

Reykingabann 1.júní 2007.

Bannað að reykja á öllum stöðum. Punktur og basta! Hvað varð um val og mat hvers fyrir sig að setjast þar sem hann best teldi sér hverju sinni? Hvað er að því að hafa BARI sem LEYFA fólki að reykja? EITT skilti í gluggann og málið AFGREITT. Annaðhvort REYKT, eða EKKI REYKT? Meira að segja ötulustu málsvarar lýðræðisins farnir að beita Adolf Hitler fyrir sig sem málsvara þess, að rétt sé að banna þennan fjanda.(Reykingar eru að sjálfsögðu ekki hollar) Ekki það að ég ætli að gera reykingar að "heilsuátaki" en finnst einhvernveginn eins og hinn þögli minnihluti hafi ekki átt sjéns í umræðunni. Við erum jú líka fólk, andsk..... hafi það. Ef Eyþór Arnalds og staurinn, eða Þorgrímur Þráinsson vilja lepja sitt vín eða kók í hreinu lofti, er ekki þar með sagt að allur landslýður eigi að gegna kallinu og gera eins og þeir. Hvað er að því að hafa bari aðskilda sem reyk eða reyklausa? Það er eins og verið sé að fara fram á einhverskonar "Apartheid" stefnu. Mig langar bara að fá mér eina rettu með mjöðnum, án þess að vera hent út á götu. Þeir sem halda því fram að aðsókn hafi aukist á írskum börum eftir breytinguna, fara með RANGT mál og ættu bara að skammast sín fyrir ummælin. Meira en 18% írskra bara lögðu upp laupana eftir gildistöku þessarar nýaldar forsjárhyggju. Þar á Adolf kallinn vel heima. Staðreyndir skipta engu máli ef "nógu ötulllega er barist fyrir málstaðnum" Æi hvað þetta er allt að verða hundleiðinlegt og "Júróskt". Bönnum næst bjór á börunum!"!!!!!!!!¨og kaffihúsunum!!!!!

Vitlaus þjóð í vanda með allt of mikinn tíma fyrir fáránlegar reglugerðir frá Brussel?

Ég bara spyr! (Og reyki samt!!!)

Sokkabuxur lausnin?

Heljarinnar ástand í Svíþjóð um helgina og fullt af fólki sem ekki komst leiðar sinnar vegna þessa verkfalls. Hitti suma á Kastrup í fyrrakvöld sem voru hreint út sagt ævareiðir og höfðu meðal annars misst af flugi til Ástralíu og fleiri staða. Vissi sjálfur ekki hvað þetta snérist um en eftir að hafa kynnt mér málið lítillega datt mér í hug hvort lausnin á þessari deilu væri einfaldlega ekki sú að bjóða þeim (Flugþjónunum) bara auka sokkabuxur, vikulega, eins og gert var hér um árið hjá Flugleiðum og sjá..... allir urðu vinir "med det samme". Vonandi að flogið verði frá Stokkhólmi samkvæmt áætlun á morgun. Ósennilegt að kóngurinn þurfi þó að undirrita eitt né neitt á frídegi kvenna(enda ekki komið að honum), þar sem þetta eru þjónar en ekki þjónustustúlkur, sem í hlut eiga. "Keep on flying"

Nýtt tilboð lagt fram í kjaradeilu SAS og flugþjóna

Al Gore og slúðrið.

Gott ef ég er bara ekki sammála honum blessuðum. Finnst a.m.k. ansi hart að þurfa að borga fyrir að fá myndir af Brad Pitt og frú, eða bara hverjum sem er í "mollinu með enn eitt ættleit barnið, utangetið, eða bara hvernig sem er getið eða fengið." Eins og það sé einhver frétt! Væri sennilega hægt að prenta blöðin með helmingi minni pappír ef þessum andsk... væri sleppt og Séð og Heyrt eða svipuð "menningarrit" látin um þetta nauðaómerkilega prump af glamúrliðinu í "Bjánavúd"eða hér heima. Það fengju þá að minnsta kosti þeir fréttirnar, þeir sem eru tilbúnir að borga fyrir þær. Hverjum er ekki sama hver var hvar eða með hverjum og hvenær? Eru þetta fréttir? Ef svo er, er fréttamennska orðin aumasta mennskan af öllum mennskum. Náttúrulega gamaldags tuðari og nenni ekki fyrir mitt litla líf að eyða tíma í lestur um eitthhvað af þessu liði. Gori kallinn kannski ekki eins vitlaus og hann í raun og veru er, eða þannig.....hummm. Eitthvað ekki rétt við þetta komment en læt það vaða samt. Ég er allavega ekki að eyða pappír í þetta bull, nema einhver taki upp á því að prenta þessa steypu, sem ég tel afar ólíklegt, enda bara tuð.

Argaþras og illar spár.

Mikið lifandis skelfingar ósköp er mörgum í nöp við nýju stjórnina okkar. Ekki vantar fúkorðaflauminn frá þeim sem krefjast lýðræðis manna og kvenna mest, en virðast þegar lýðræðið hefur ALGERAN meirihluta, ekki geta sætt sig við það. Menn og konur í nýrri stjórn nefnd öllum mögulegum og ómögulegum nöfnum og viðurnefnum og alveg á hreinu að þetta sé allt eitt allsherjar "fíaskó" allt saman fyrirfram og fólkið sem sest í nýja stjórn varla meira virði en skítur undir skó, sumt hvert. Pólitík er skrítin tík eins og ég hef áður sagt (og reyndar mér mikið meiri menn, löngu fyrr), en hún er að sjálfsögðu ekkert annað en málamiðlun, þegar upp er staðið. Gefum fólkinu frið til að sanna sig og sleppum öllum hrakspám og illmælgi um það sem ekki er orðið. Ef einhver efast um hve gott er að búa á Íslandi, skal ég glaður sýna þeim hinum sama hve lífið getur verið "skítt" annars staðar, gegn vægu gjaldi. 

Deep Purple stjórn?

Loks búið að mynda stjórn og eins og gefur að skilja ekki allir sáttir með samsetninguna, hvort heldur er eftir kyni eða verðleikum. Jafnvel byrjað að úthúða og andskotast út í hina og þessa sem hana skipa og allt fundið þeim til foráttu. Einum finnst gaman að skjóta hreindýr, ekki nógu margir með typpi og þannig mætti áfram telja. Væri ekki í lagi að sjá hvað í þessu fólki býr og hver þeirra verk verða á næstunni, frekar en að vera að fjargviðrast þetta út um mela og móa? Gefum þeim grið í stórskotaorðaflaumnum, en látum þau jafnframt vita að að vel verður fylgst með þeim á næstunni. Ýmsum nöfnum hefur verið varpað á þessa nýju stjórn okkar og er þar af nógu að taka. Hefur hún verið nefnd við stórveldi í viðskiptalífinu oftast nær og margir komið fram með hin ýmsu og oft á tíðum bráðsmellnu nöfn henni til handa, í því sambandi. Ég tel að gefa eigi þessari stjórn vinnufrið og meta hana eftir því sem hún fær áorkað. Því legg ég til að hún verði kölluð "Deep Purple" og er það vel við hæfi, þar sem samnefnd hljómsveit er einmitt um það bil að fara að halda konsert hér á næstu dögum.(Gott ef Uriah Heep verður ekki með líka) Því nafni verður ekki bendlað við einn eða neinn í viðskiptablokkunum. Einnig vegna þess að ef blandað er saman bleiku og bláu fær maður út "Deep Purple"(Eða svona hér um bil), nema náttúrulega þeir sem þvælast um með höfuðið fullt af dónalegum hugsunum. Þeir sjá að sjálfsögðu aldrei annað en "Bleikt og Blátt". Kveðja frá Vigo á Spáni, þar sem nýju stjórninni er fagnað með þrumum og ærandi eldingum af stórkostlegustu gerð.

Ber að ofan? Big News!

Er einn af þeim gamaldags tuðurum sem finnst að með birtingu svona "frétta" í miðlum sem maður er jafnvel að borga fyrir, sé klárlega verið að ganga út frá því sem vísu, að ég og allir hinir sem borgum áskriftina, séum taldir algerir vanvitar. Fréttir af veruleikafirrtum stjörnum er ekki beinlínis það sem mig þyrstir í að frétta af. Mætti ég biðja um aðeins meiri metnað. Svona eins og 100% meiri, eða er þetta bara tómt tuð í mér? Má vel vera. Þó það kosti að Mogginn verði ekki nema fjórblöðungur, væri mér alveg sama, ef ég bara þyrfti ekki að berja svona endemis þvælu augum. Sölumennskan hefur náð nýjum víddum í lágkúru og mál að linni. Mig varðar akkúrat ekki ra..... um hvort þessi eða hinn í "Bjánavúd" er edrú eða drukkinn, skilinn eða giftur og ennþá síður úti í búð að versla, með sín börn, ættleidd börn, eða bara á bensínstöð. Leifið okkur að njóta þess að halda að við séum að minnsta kosti með sjálfum okkur á morgnana við lestur miðlanna sem gubbast inn um bréfalúguna, hvort sem okkur líkar betur eða ver. Sjálfsagt bara tuð í manni, en orðið slæmt ástand þegar blöðin eru farin að detta beint í tunnuna, án þess nokkur nenni að lesa þau. Gróður jarðar á ekki skilið að vera misnotaður á þennan hátt. Látum trén í friði og sleppum frekar þessu ands....... bulli.

Topplaus Britney þakkar fyrirbænir