Halldór Egill Guðnason

21.12.2008 | 20:09

Lengsti dagur ársins-Gleðileg jól!

Já, hér suður frá er nú lengsti dagur ársins og hásumar. Það er hins vegar fátt sem er eins og um hásumar hér, fyrir utan langan dag. Við erum nú staddir um sjötíu sjómílur SA úr Magellansundi, (Argentínumegin að sjálfsögðu) og hér geysaði stórastormur af suðri í alla nótt og hitinn ekki nema tvö stig um tíma. Hér er jú allt öfugt við það sem er á norðurhjaranum, eins og gefur að skilja. Lægðirnar snúast "öfugt", sunnan áttin er hér ísköld, vaxandi tungl passar í lófa vinstri handar og stjörnumerkin, tja veit svosem ekki mikið um þau, en sýnist Fjóskonan hljóti að vera búin að hella niður allri mjólkinni, eða þannig. Jólin nálgast þó hér eins og annarsstaðar, þrátt fyrir að frekar lítið fari fyrir undirbúningi þeirra um borð. Allt gengur sinn vanagang, sama hvaða dagar eru og hvorki jól né aðrar hátíðir sem breyta neinu um það.

Netsamband hefur verið frekar slitrótt undanfarið, svo Tuðarinn vill nota tækifærið, meðan samband er og óska fjölskyldunni allri, vinum, vandamönnum, bloggvinum og öllum þeim sem hann þekkir, eða þekkir jafnvel ekki neitt, gleðilegra jóla og farsæls komandi árs, með von um að á næsta ári nái þjóðin að standa saman í þeim hremmingum sem framundan eru. Ekki veitir af! Sjáumst eða heyrumst hress og kát á næsta ári.

Kær jólakveðja úr suðurhöfum,

"The Tudor" Cool

Flokkur: Stjórnmál og samfélag | Breytt s.d. kl. 21:06 | Facebook

Athugasemdir

Gleðileg jól Halldór! Láttu ekki kuldabola taka þig.

Hrönn Sigurðardóttir, 22.12.2008 kl. 00:56

Halldór minn það verður óttalega skrýtið að hafa þig ekki heima um jólin og verður þín sárt saknað af öllum. Hér gengur "allt" sinn gang og ekki er veðrið hér neitt til að hrópa húrra fyrir, rigning og rok - vonandi lægir á jóladag. Við pabbi þinn sendum þér og skipshöfninni bestu hátíðarkveðjur og vonum að þið hafið það eins gott og hægt er þarna við suðurpólinn.