Halldór Egill Guðnason

22.8.2007 | 10:26

Reykingabann-Einkasamkvæmi lausnin??

Það er ef til vill að bera í bakkafullan lækinn að fara að tuða um reykingabannið fræga, en get ekki á mér setið lengur.

Reykingar eru óhollar. Það er hverjum manni ljóst. Nú hafa þær verið bannaðar mjög víða og ekkert nema gott svosem um það að segja, nema hvað mörgum þeim sem reykja ( þar á meðal mér) finnst sem fulllangt sé gengið í upprætingunni á þessum ósið. Forsjárhyggjan alger og ekki boðið uppá neitt val um eitt eða neitt, er reykingar eru annars vegar. Út á götu með hyskið og látum það hýrast þar eins og fávita í öllum veðrum, meðan puritanarnir og “hagstæða” fallega fólkið sem aldrei gerir neitt sem er óhollt og er svo heilbrigt og gallalaust, situr inni á börum og skemmtistöðum, í svitalyktinni lepur sitt “holla” vín og öl og gerir góðlátlegt grín að þessum aumingjum sem úti standa. Í einfeldni minni fæ ég ekki skilið hvers vegna ekki má hafa bari eða skemmtistaði þar sem má reykja. Þeir sem ekki reykja færu þá á þá staði sem ekki er reykt á. Þeir sem ynnu á reykstöðum vissu af því að þeir væru að vinna á reykstað og þeir sem ekki vildu vinna á reykstað ynnu á reyklausum stöðum. Er þetta eitthvað flókið? Þarf að handstýra öllu með boðum og bönnum? Hvað um að hafa val um hluti? Á bara að slá það út af borðinu? Hvar verður gripið niður næst? Ég veit að reykingar eru óhollar, en það er svo margt annað sem er það líka. Skil alveg rökin hjá þeim sem ekki reykja, að vilja vera á reyklausum stöðum. Það er bara akkúrat ekkert að því og hið besta mál. En að valta svona yfir okkur reykingafólkið, finnst mér andskoti skítt. Hræddur um að margar ölstofur og veitingahús fari á höfuðið eftir komandi vetur. Þó ég reyki, ætla ég ekki að fara að norpa utan við ölstofu niðri í bæ ef mig langar í öl og smók. Þá drekkur maður frekar sitt öl eða vín heima hjá sér, þar sem enn sem komið er, fæ ég einhverju ráðið. Þar sem reykingabannið á við alla opinbera staði og samkomur, legg ég til að reykingamenn haldi lokuð einkasamkvæmi á ölstofum borgarinnar í vetur meðan illa viðrar, þar sem ekki er hægt að fetta fingur út í það samkvæmt laganna hljóðan, eða hvað? Spyr sá sem ekki veit. Leiðréttið mig endilega ef þetta er rangt túlkað, en í guðs bænum, ekki fara að romsa eða raupa um óhollustu eða tillitssemi gangvart þeim sem ekki reykja. Ég er alveg búinn að fá upp í berkjur af því að hlusta á það. Læt þessu tuði lokið að sinni og farinn í smók.

Flokkur: Stjórnmál og samfélag | Facebook

Athugasemdir

Vááááááá!!!!!!!

Bestu kveðjur frá Kalla Tomm.

Karl Tómasson, 22.8.2007 kl. 14:56

Sammála!

Eva Þorsteinsdóttir, 22.8.2007 kl. 15:39

Alveg er ég sammála þér. Meðan reykingar eru leyfðar skv. lögum, þýðir ekki að koma með önnur lög sem banna þær alls staðar. Þetta er tóm fásinna. Að fólkið hafi val, það er málið. Ég er ein af þeim örfáu fyrrverandi reykingamönnum sem er ekki fanatísk.... og það er annað dæmi sem ég skil ekki. Fanatík.

Anna Einarsdóttir, 22.8.2007 kl. 17:40

Fanatík...mjög einfalt.....ógeðslega óþolandi.

Gíslína Erlendsdóttir, 22.8.2007 kl. 22:55

heyrðu ... ég var að skipta um mynd á blogginu mínu - vona að þið finnið mig samt, var nokkuð oft búin að fá athugasemdir frá ættingjum og vinnufélögum um að hin myndin væri ekki eins falleg og ég er i raun og veru sko