Árás á Íran - Næsta góðverk BNA?

Það er ekki skrýtið að Putin og Lavrov hafi áhyggjur af þessari umræðu um hugsanlegar árásir á Íran. Öll heimsbyggðin ætti að óttast þessa umræðu, því svipuð rök hafa áður verið notuð af BNA fyrir ekki svo löngu síðan, til að réttlæta innrásina í Írak. Ekki enn séð fyrir endann á þeim hildarleik og verður ekki í bráð. Þó forseti Íran fari mikinn í allri sinni framgöngu og helli úr sér yfir Ísrael og aðrar þjóðir með ýmiskonar svívirðingum og munnsöfnuði, sem varla sæmir þjóðhöfðingja, er ekki þar með sagt að komið sé veiðileyfi á Íran og óhætt að hefja árásir. Í Íran búa milli 70 og 80 milljónir íbúa og þar í landi er lífið annað og meira en bara svartklæddar konur, öfgafullir klerkar eða mótmælendur vestrænna gilda. Það er hins vegar sú mynd sem kemur upp í hugann hjá mörgum og þarf svosem engan að undra. Fréttaflutningur sá sem okkur stendur til boða af þessu svæði og því sem þar gerist kemur jú að stórum hluta frá BNA, en þeir eiga eins og flestir vita, í beinu stríði á þessu svæði. Hlutlaus fréttaflutningur er því varla til, en því miður étur hver  evrópska fréttastofan vitleysuna eftir kananum og matreiðir ofan í okkur. Íslenskir miðlar eru þar heldur engin undantekning. Þægilegari "fréttamennska" getur tæpast verið til. Bara "copy" og "paste", smá þýðingar inn á milli og síðan óhætt að dæla öllu saman út á öldur ljósvakans. Ekki einu sinni haft fyrir því að skoða málin eða kryfja til mergjar. Úr öllu saman verður síðan einn allsherjar hræðsluáróður, sem stjórnvöld í BNA taka síðan að sér að kveða niður með vopnavaldi. "Sjálfskipaðir kyndilberar frelsis og manngæsku", svo fremi það séu einhver verðmæti í spilinu eins olía eða annað "smálegt". Hver ætli hagnist síðan mest á öllu saman í fjárhagslegu tilliti? Getur verið að það séu vopnaframleiðendur í BNA? Eiga þeir stóra hluti í þarlendum fjölmiðlum sem endalaust dæla út einsleitum fréttum frá þjóð í stríði.? Getur verið að þeir séu öflugir bakhjarlar í kosningasjóðum frambjóðenda? Jafnvel núverandi forseta BNA? Ekki gott að segja, en það væri mikill fengur, fréttaþyrstum manni, að sjá meiri metnað lagðan í umfjöllun af heimsmálunum en nú er gert. Þetta er ekki bara svar/hvítt og "copy-paste" og smæla framan í myndavélina.           

Pútín og Lavrov lýsa áhyggjum af umræðu um árásir á Íran

Athugasemdir

[Júlíus Sigurþórsson, 26.2.2007 kl. 15:40]

Heldur þú að það sé einhver tilviljun að í hverri einustu sýslu í hverju ríki í BNA er einhverskonar vopnaiðnaður? Nánast hver einast þingmaður í fulltrúadeildinni og öldungadeildinni í báðum flokkum er á einhvern hátt tengdur vopnaiðnaði þar. Beint eða óbeint.

Efnahagur BNA virðist þrífast á þessum iðnaði sem var stofnað til í seinni heimstyrjöldinni.

Valið hjá þeim er standandi her, vígbúnaður og stórir "óvinir" sem þarf að berjast við - eða atvinnuleysi á stóran mælikvarða.

Auðvitað er þeim vorkun, en eins og Eisenhover sagði í kveðjuræðu sinni sem forseti " það versta sem fyrir Bandarískt samfélag getur gerst, er að hafa tilbúnar herdeildir (standing armys) viðbúnar undir vopnum. Það mun kosta samfélagið ómældan peninga og ófrið víða um heim" og þetta var sagt 1962 ef ég man rétt.

[Halldór Egill Guðnason, 27.2.2007 kl. 20:50]

Kveðjuræða Eisenhovers hljómar enn, en það hlustar enginn, því miður.

[halkatla, 28.2.2007 kl. 23:07]

Maður þarf sko að hafa sig allan við til þess að láta ekki blekkjast af því sem er þægilegt og auðvelt að hugsa um. Þetta er algerlega stereótýpan af Íran; klerkar, konur með blæjur og kjarnorkuvopn. En sem betur fer er einsog Bush hafi ekki lengur leiðtogasjarmann, hann er voðalega einn í öllum sínum ummælum núna. Ég tek undir með þér að þetta hljómar allt mjög kunnuglega.... 

[Halldór Egill Guðnason, 28.2.2007 kl. 23:51]

Segi bara eins og Roger Waters úr Pink Floyd.: This trip changed my life! The goodwill that met me will never be replaced........?

Búinn að vera þarna, lífið er ekki bara svart og hvítt. Ef veröldin telur þessa þjóð heimsins mestu ógn..... eigum við ekki betra skilið.