Fáni Tævan fjarlægður!

Það er glæsileg umgjörð um þessa Alþjóðaleika ungmenna sem nú stendur yfir. Vel skipulögð setningarathöfn og allt eins og best verður á kosið. 1200 þátttakendur gengu fylktu liði undir þjóðfánum sínum, allir nema ungmennin frá Tævan. Þáu máttu una við það að þurfa að ganga undir ólympíufána sem fána síns lands. Svipað og íslenskir þátttakendur á mótum marseruðu undir fána Búrúndí eða Angóla. Fánasviptingin tilkomin vegna þess að urrað var í kínverska sendiráðinu og ekki að sökum að spyrja. Íslendingar leggjast í gólfið eins og vel siðaðra hunda er siður og fjarlægja fána Tævan "med det samme" eins og ekkert sé sjálfsagðara. Ég sagði í fyrradag að ég myndi hundur heita ef þetta gerðist ekki, svo ég get verið rólegur og sleppt því að æfa gelta og urra enn um sinn. Lítil er reisn þeirra sem leggjast eins og rakkar, í hvert sinn sem urrað er úr gróðavonarátt. Svartur blettur á annars glæsilegri samkomu.

Athugasemdir

[Björg F (IP-tala skráð) 22.6.2007 kl. 16:41]

Ég bara trúi því ekki að við Íslendingar höfum lagst svo lágt. Hver ber ábyrgð á þessari ákvörðun.. og eru þeir starfi sínu vaxnir. Hvar eru Íslendingarnir sem tilheyra Jóni Sigurðssyni, sem standa upp og segja "Vér mótmælum" A það ekki jafnt við um lýðræði annara eyja?

[Haukur Nikulásson, 22.6.2007 kl. 16:52]

Ég hélt að við hefðum fyrir löngu viðurkennt sjálfstæði Taiwan. Ógnir Kínverja við Taiwana eru siðlausar, þeir hafa ekkert haft af þeim að segja í rúm 50 ár og það er löngu kominn tími á að aðrar þjóðir viðurkenni sjálfstæði Taiwans pólitískt séð.

Ég hef átt góð viðskipti við Taiwan í gegnum tíðina og mig undrar ekkert að þeir séu þetta stórveldi í tæknigeiranum. Þeir hafa líka verið meginlandi Kína hjálplegir í sambandi við uppsetningu verksmiðja og mér finnst því undarleg þessi hegðun ráðamannanna í Beijing. 

[Fransman (IP-tala skráð) 22.6.2007 kl. 17:10]

Taiwan hefur aldrei lýst formlega yfir sjálfstæði þannig að það hefði verið ansi erfitt fyrir Íslensk stjórnvöld að finna ástæðu fyrir því að láta fánann hanga uppi.

[Halldór Egill Guðnason, 23.6.2007 kl. 01:50]

Aldrei lýst yfir sjálfstæði???