Skilaboð til "leiðindapúkanna".

 Hvað er fólk með öndunarsjúkdóma, eða aðra viðkmæmni að hanga utandyra á miðnætti gamlárskvölds, ef ekki til að horfa á flugelda? Varla fer það út þetta kvöld í framtíðinni til að horfa á "rótarskot"? Trén vaxa nú trauðla svo hratt að það náist upp einhver stemming yfir blámiðnætti gamlárskvölds yfir því.

 Þessi ósköp vara yfirleitt ekki lengur en einn til tvo tíma og hafa verið langstærstum hluta þjóðarinnar til mikillar gleði, nema ef vera skyldi þeim sem óvarlega fara með púðrið og vilja kíkja ofan í rörið, til að vera alveg viss um að tekist hafi að tendra í tundrinu. Nokkuð sem þeir hefðu aldrei gert, ef aðeins þeir hefðu lesið leiðbeiningarnar og ekki síst farið eftir þeim.  

 Það er til fyrirmyndar að merkingar skuli hafa batnað til muna hjá söluaðilum. Það er aðeins af hinu góða og verður vonandi eitt af því sem stuðlar að áframhaldandi ljósadýrð og "fírverki" sem aðeins stendur örstutta stund, áramót hver. 

 Þið sem ekki þolið þetta.: Verið inni, lokið gluggum, setjið á ykkur "headsettið" með góðri tónlist, eða hreinlega tappa í eyrun og farið snemma að sofa. Fylgist síðan með "Rótarskotunum" þegar bjart er orðið hálfu ári síðar og tryllist úr gleði! Það er fátt sem jafnast á við að sjá gróðurinn vaxa!

 Þið sem skjótið upp herlegheitunum.: Hagið ykkur skynsamlega, lesið leiðbeiningarnar og ekki vera fábjánar! Hóflega drukkið vín gleður mannsins hjarta og varúð í meðferð skotelda gerir það einnig. Þeir segja að rónar hafi komið óorði á brennivínið, en óvarlegheit og fíflagangur í meðferð skotelda gera slíkt hið sama, altso á skoteldana, ekki brennivínið. Að blanda síðan saman of miklu brennivíni og skoteldum gengur frá orðstír beggja.

 (Bæti örugglega einhverjum rótarskotum við skotterturnar í ár, því fyrir utan mannfólkið, þykir mér um fátt vænna en að sjá Guðsgræna náttúruna vaxa og dafna og hlakka ósegjanlega til sumarsins)

 Góðar stundir, með áramótakveðjum að sunnan.

Flugeldar betur merktir í ár

Athugasemdir

[Ásgrímur Hartmannsson, 29.12.2018 kl. 00:23]

Flugeldar hafa lengi verið lélegt tæki til að Darwineita vitleysinga.  Þeir ná að merkja þá vitlausustu, en ekkert meira.

Svo þeir eru bara jákvæðir.

[Halldór Egill Guðnason, 29.12.2018 kl. 00:44]

 Æi vertu bara inni Ásgrímur. Lokaðu gluggunum og hækkaðu hitann, settu góða plötu á fóninn, eða farðu bara hreinlega snemma að sofa. Vitleysingurinn ég ætla að skjóta rakettum og hafa gaman, meðan það er enn leyfilegt að vera vitleysingur! Það styttist sennilega líka í það að það verði bannað.

 Gleðileg áramót kúturinn minn. Njóttu síðan rótarskotanna í sumar í algerri þögn úti í Guðsgrænni náttúrunni. Ekki gleyma frjókornasíunni og astmalyfjunum.