Íslendingar eru furðulegt fólk.

Tuðarinn er tengdur rekstri tveggja fyrirtækja, nálægt þeim stað, er eldsvoðinn í kvöld átti sér stað. Um leið og boð bárust um þennan eldsvoða straujaði kvikyndið sér á staðinn, til að loka gluggum, slökkva á loftræstikerfum og öðru slíku, sem auðséð var að þyrfti að gera. Á leiðinni á staðinn glumdu skilaboð í útvarpinu til borgarbúa, um að halda sig fjarri vettvangi brunans, svo tryggja mætti aðgengi lögreglu og slökkviliðs, auk björgunarsveita, því ljóst þóttti, að hér var STÓRBRUNI í gangi.

Hvað blasir svo við Tuðaranum, þegar hann nálgast svæðið? Jú, það er engu líkara en kominn sé 17. júní og allir á staðnum til að "njóta" gleðinnar. Þvílíkt og annað eins samansafn af fólki hefur ekki sést í þessum bæjarhluta, frá því annar stórbruni varð þar sem Tuðarinn rekur nú sitt hafurtask. Eina sem vantaði í þetta sinn, var hoppukastali fyrir börnin.

Þið verðið bara að fyrirgefa mér, samborgarar góðir, en þó sjónvarpsdagskráin sé léleg, er svona fjöldasamkoma fáránleg!

Í kvöld töpuðu eigendur fyrirtækja, sem brunnu, óheyrilegum fjármunum og vinnu. Að horfa upp á það að slökkvibílar og lögregla komist ekki leiðar sinnar, sökum "BJÁLFA", er ömurlegt. Þegar slökkvibíll Reykjavíkurflugvallar kom á svæðið, þurfti hann að bíða í hringtorgi, með öll ljós logandi og þegar slökkvibíll slökkviliðsins í Sandgerði reyndi að komast að, komst hann hvorki lönd né strönd, fyrir bjálfum, sem datt í hug að bjóða sjálfum sér eða öðrum fjölskyldumeðlimum í eyðileggingar "on the spot" bíltúr.

Kvikyndið sem þetta ritar er svo gjörsamlega dolfallið, yfir fíflagangi samborgara sinna, að það á ekki orð. Þvílíkur sirkús!

Slökkvilið, lögregla og björgunarsveitir eiga hins vegar heiður skilinn, fyrir frammistöðuna.

Borgarar Reykjavíkur falla algerlega á prófinu og fá ekki einu sinni -1, hvorki fyrir frammistöðu eða viðleitni. 

Hvað gerist ef GÝS í borgarlandinu? Fara þá allir í bíltúr?

Góðar stundir. 

„Hlustið, færið ykkur!“