Paul Watson kominn í Álafosshvosina?

Það eru vesælar sálir sem taka uppá svona löguðu. Engu líkara en að "gáfumennið" Paul Watson sé mættur á svæðið til stuðnings við málstað sem á sér æ færri fylgjendur, eftir því sem dagarnir líða. Hvort sem um er að ræða skemmdir á vinnuvélum eða niðurrif á girðingum, er hvorugt líklegt til árangurs og síst til þess fallið að auka samhug með með þeim sem eru á móti framkvæmdinni. Hvort sem þarna er verið að grafa fyrir skólprörum eða vegarstæði, skiptir engu máli. Framkvæmdin er lögleg og ekki við verktakann að sakast, þó einhverjir séu ósáttir við raskið. Það er verið að byggja nýtt hverfi í landi Helgafells og þangað þarf fólk að komast til og frá. Búið er að taka tillit til þeirra sem mótmæltu veginum eins og kostur er og nú er komið að framkvæmdinni. Vel skiljanlegt að ekki séu allir sáttir við allar framkvæmdir og slæmt fyrir suma þegar leggja þarf vegi innan þéttbýlis sem auka umferð í grónum hverfum. Hjá því verður hins vegar ekki komist í vaxandi bæ og vonandi að fólk fari nú að slíðra sverðin og stuðla að áframhaldandi uppgangi Mosfellsbæjar. Þar er gott að búa. Hvort kjósa eigi um allar framkvæmdir sem hreyft er mótmælum við, tel ég afar hæpinn kost. Bæjarbúar hafa þegar veitt umboð sitt til bæjarstjórnar að sinna sínum málum næstu árin og eiga ekki að þurfa að vera sinkt og heilagt að leggja blessun sína yfir hin ýmsu verk, stór eða smá. Á til að mynda að kjósa um hvort byggja eigi hið nýja hverfi í Leirvogstungu núna, þegar framkvæmdir eru hafnar? Ég bara spyr. Þar er búið að stórraska útsýninu hjá mömmu og pabba, en þau eru svosem alveg róleg, þannig lagað séð.   

Skemmdarverk unnin á vinnuvélum í Helgafellshverfi

Athugasemdir

[Björg F (IP-tala skráð) 16.5.2007 kl. 20:33]

Að setja veg þarna er eins og að ætla að leggja tengibraut í mitt grjótaþorpið hér í miðbæ RVK.. nema hvað að kvosinn er dýrmætari.. því hún er meira sjarmerandi. Þetta er auðvitað rosalega mikið tilfinningamál.. Ég skil Varmásamtökin vel og finnst leitt að einhverjir kolruglaðir einstaklingar eru að eyðileggja þeirra málstað með svona skemmdarverkum á saklausar vinnuvélar..

[Halldór Egill Guðnason, 16.5.2007 kl. 22:31]

Kæra Björg. Vissulega er þetta mikið hitamál. Þetta er fallegur staður og um að gera að reyna að halda honum áfram þannig. Sé ekkert sem kemur í veg fyrir það. Legu tengibrautarinnar hefur verið breytt, þannig að sem minnstu ónæði valdi, en það er bara einfaldlega ekki hægt að gera allt svo öllum líki. Vaxandi byggð kallar oft á tíðum á óvinsælar framkvæmdir og er þetta ein af þeim. Þetta með vinnuvélarnar er náttúrulega bara klikkun. Ekki hvarflar að mér að brjóta rúður í strætó þó hann aki framhjá húsinu mínu á korters fresti. Eins og frægur maður sagði á sínum tíma.: "Svona gerir maður ekki" 

[Herdís Sigurjónsdóttir, 17.5.2007 kl. 11:27]

Já það er gaman að sjá að fólk setur sig inn í málin og það hefur þú greinilega gert Halldór Egill.

Já hvað á að kjósa um?  Tökum sem dæmi nýja íþróttahúsið og sundlaugina við Lágafellsskóla. Að frumkvæði foreldraráðs skólans var farið var að skoða það að byggja líka sundlaug við litla íþróttahúsið sem gert var ráð fyrir að kæmi við skólann. Gerðir voru útreikningar sem sýndu að það var álíka dýrt að byggja þarna og rífa gömu Varmárlaugina og byggja nýja sundlaug á þeim stað og reka. Fyrir utan það að á framkvæmdatímanum hefðum við verið sundlaugarlaus og ættum bara eina sundlaug í dag. Þegar sú framkvæmd var á teikniborðinu voru hávær mótmæli frá minnihlutanum og gengu fulltrúar hans um bæinn og söfnuðu undirskriftum á móti byggingu sundlaugarinnar. Ég hef hitt fjölmarga sem fengu rangar upplýsingar um málið og skrifuðu undir listann og sáu mjög eftir því. Nú þegar sundlaugin er komin eru allir eru alsælir með þessa niðurstöðu og ekki síst börnin sem nú sleppa við skólaakstur í sund í Varmárlaug. Ég fullyrði að ef kosið hefði verið um þessa framkvæmd á þeim tímapunkti sem óánægjuraddir voru sem háværastar væri sundlaugin ekki á þessum stað. Ég stóð að því ásamt meirihlutanum að þessi framkvæmd yrði að veruleika og var alla tíð sannfærð í hjarta mínu um að þetta væri bæjarbúum fyir bestu og er ég það enn í dag.

Það sem er mikilvægast er að fólk kynni sér málin vel og taki ekki upp frasa þeirra sem mótmæla, sem er allt of algengt. Ég hef heyrt í fólki og séð blogg þar sem fólk hefur sterkar skoðanir á málinu en veit ekki hvar Álafosskvosin er og heldur jafnvel að það eigi að leggja veg þar í gegn, sem bendir til þess að mótmælendum hafi enn og aftur tekist betur að koma sínum skoðunum á framfæri, eða að fólk og fjölmiðlar hafi bara meiri áhuga á þeirri hlið málsins. 

Ég hef skrifað um þetta mál og skrifaði eina færslu um málið í gær.

[Halldór Egill Guðnason, 17.5.2007 kl. 21:24]

Herdís, aþakka innleggið. Bý í Leirutanganum og sé ekki sem nýlega fluttur hingað, hvernig fólk gat verið á móti nýju sundlauginni hér steinsnar frá. Það má ekki gleyma því í hvaða átt Mosfellsbær á eftir að þróast héðan næstu árin og rétt að menn geri sér grein fyrir stærð Blikastaðalandsins í því samhengi. Það er ávallt slæmt þegar fólk æsir sig upp úr öllu valdi, án heildarsýnar á framtíðina. Dugar í því samhengi að benda á Perluna og Ráðhús Reykjavíkur.

[Gunnlaugur B Ólafsson, 17.5.2007 kl. 23:11]

Þið virðist óttast íbúalýðræðið, bæði tvö. Ég er búin að benda Herdísi á námskeið um íbúalýðræði sem Samband íslenskra sveitarfélaga hefur samið við ALTA um að halda. Ef Herdís hefði sótt íbúaþing Varmársamtakanna þá hefði hún getað heyrt mjög áhugavert erindi Sigríðar Kristjánsdóttur formanns skipulagsfræðinga um íbúalýðræði. Við erum allt lífið að kjósa eða velja um eitthvað. Þannig velur bærinn að vinna með einhverjum verktökum eða að taka þessu tilboði eða hinu tilboðinu. Í stærri málum er það æskilegt að matreiða hugmyndir og hlusta eftir afstöðu bæjarbúa. Það er ekki hægt að gera endalaust ráð fyrir því að ef að íbúar viðra hugmyndir sem falla ekki að áformum ríkjandi meirihluta að það sé byggt á "misskilningi" eins og var endurtekið orðaval hjá Haraldi Sverris um Helgafellsbraut í Hlégarði og hjá Jóhönnu bæjarverkfræðingi um Tunguveg í Varmárskóla. 

Nú er Herdís hér að segja að fólk hafi "misskilið" spurningalistana. Það eru þá einhverjir örfáir, en þess ber að gæta að við vorum komin með um helming kosningabærra íbúa á blað og höfum örugglega átt stuðning um þriðjungs af þeim sem að ekki voru á blaði, voru ekki heima eða vildu ekki skrifa undir vegna einhverrar eðlishógværðar eða af öðrum ástæðum. Sumir sögðust óttast að bæjaryfirvöld gætu séð viðhorf þeirra í þessu máli! Sannfærður um að 70% bæjarbúa vildu hafa aðalsundlaug bæjarins á Varmársvæðinu. Þau höfðu ekki misskilið eitt eða neitt. 

Tel að sundlaugamálið hefði verið tilvalið til að kjósa um. Unsirskriftirnar voru á þann veg að spurt var hvar fólk vildi hafa aðallaug bæjarins, þeir sem vildu setja uppbyggingu sundlaugar bæjarins á Varmársvæði í forgang fram yfir uppbyggingu á vestursvæði voru beðnir um að skrá sig á blað. Það var ekki verið að taka afstöðu gegn skólalaug við Lágafellsskóla. Hin glæsilegu áform um uppbyggingu á Varmársvæði hefðu sómt sér þar vel núna. Leirvogstunga, Helgafellshverfi, Reykjahverfi, Miðbær og Vestursvæði - allt í góðum stígatengslum við laugina. Í stað þess var tekin upp hverfisstefna þar sem bara íbúar á Vestursvæði eru ánægðir með staðsetninguna. Og Varmárlaug í lélegu ástandi, en eitthvað stendur til að lagfæra þar í sumar.

Finnst gert lítið úr fólki að vísa til undirskriftanna sem einhvers hávaða frá "minnihlutanum" og að menn taki undir "frasa þeirra sem mótmæla". Þetta er nú ekki margslúngin spurning, um staðsetningu á aðallaug bæjarins. Ég samdi textann sem að var notaður sem haus og kannast ekki við notkun á neinum frösum. Við vorum tveir samkennarar sem að fórum af stað með þetta mál og það var ekkert gert á forsendum neins minnihluta í bæjarstjórn. Hinsvegar gerðist það í framhaldi að fólk sem að er virkt í flokkunum í minnihluta kom að söfnun undirskrifta. Svipað er með Varmársamtökin. Þar hafa fulltrúar minnihlutaflokka komið í kjölfarið og haft áhuga á málinu og sett það í hið flokkslega samhengi. Það hefur sína kosti og galla. Aðalmálið er að hugmyndavinnan er í hvorugu tilfellinu á flokkslegum forsendum.

Svona í lokin, þá finnst mér það í raun skondið að segja að draumastaðsetning meirihluta um tengibraut við Helgafellshverfi fari ekki um Álafosskvos. Kvosin sem landfræðilegt hugtak er mynduð af brekkunum í kring. Brautin á að fara um brekkuna í norðvesturhluta kvosarinnar. En Herdís, við vorum búin að ná samkomulagi um að vera ekki alltaf sammála, en samt bara í aðalatriðum ánægð með hvort annað. Á aðeins eftir að ná dómhörkunni úr honum Halldóri ......  Punktur.

[Gunnlaugur B Ólafsson, 17.5.2007 kl. 23:14]

Gleymdi mér aðeins, hefði sennilega átt að skrifa undir sem PAUL

[Halldór Egill Guðnason, 18.5.2007 kl. 00:04]

Dómharka er eitthvað sem verður oft til þegar menn fara að gefa öðrum upp ákveðnar skoðanir. Líkar illa þegar "pólitískri pólitík"" er ruglað saman við "bæjarpólitík". Þetta tvennt er alveg tvennt ólíkt og í raun sitthvor tíkin. Það sem mér leiðist mest er það, þegar menn og konur geta ekki tekið því að hafa beðið lægri hlut. Ef ekki koma fram rök eða tilmæli sem klekkja á hugmyndum eða vilja meirihlutans, verður minnihlutinn að beygja sig undir það. Það er líka íbúalýðræði. Það má síðan alveg skoða hvort kjósa eigi um alla mögulega og ómögulega hluti í verkum hverrar bæjarstjórnar, en HVER á að ákveða hvenær og hvað á fara á þann veg eður ei? Til hvers kjósum við okkur bæjarstjórn ef ekki til að fara með þessi mál hver fjögur ár? Þeir sem geta komið fram með yfir 20% fylgi við kosningu, um hitt eða þetta ættu að gefa sig fram hverju sinni ef löggjöfin kveður á um slíkt. Gæti alveg sætt mig við það. Get hins vegar enga veginn sætt mig við það að menn og konur vaði áfram og eyðileggi hluti og láti eins og bjánar, bara vegna þess að þau  voru á móti því sem átti að gera. "Punctum" ? Sjáum bara til. (Sennilega tvírætt að segjast hafa sagt sitt síðasta orð og þurfa svo sí og æ að brjóta oddinn)