"Refsivísitala Sársaukans"

Hef verið að velta þessu orðatiltæki fyrir mér að undanförnu. Að sjálfsögðu ekki til, enda bara hugtak í hausnum á mér. Aðallega í sambandi við gengna dóma í alls kyns dómsmálum, þar sem flestir geta verið sammála um að miðað við alvarleika brotanna, hafi dómarnir verið í hróplegu ósamræmi við verknaðina og komið okkur öllum á óvart. Hvort heldur hefur verið, líkamsmeiðingar, kynferðisafbrot eða annað, hefur almenningur staðið eftir gapandi af undrun og reiði.

Dómstólar hafa , að því er virðist, fest sig í viðjum vanans og ekki séð ástæðu til annars en að dæma hvert málið á fætur öðru samkvæmt "fyrrgengnum dómum". Sem sagt kolfastir í sama farinu og bara ágætt að dæma "ditto" miðað við síðasta dóm í "sambærilegum málum". Reyndar hefur komið fram að dómar hafi verið að lengjast í kynferðisafbrotamálum um "allt að einhverja mánuði"! Það ætti að láta okkur öllum líða betur, ekki satt?

Á tímum hraða, Hnattvæðingar, Nastaq, Vísitölu Neysluverðs og Byggingarvísitölu, ætti að vera hægt að setja saman starfshóp hinna ýmsu fræðinga, um hin ýmsu mannlegu málefni, sem hefðu það markmið eitt að finna út "Refsivísitölu Sársaukans" sem gera myndi dómstólum þessa lands auðveldara að losna úr viðjum vanans og dæma eins og menn. Refsiramminn er skýr, en hann er í undantekningartilfellum nýttur, sökum þess að "fordæmin" leyfa engin frávik. Með því að leyfa skírskotun í þessa nýuppfundnu vísitölu, sem jafnframt yrði heimilt að nýta sem "argument" í dómum yrði dómurum réttarkerfisins gefinn kostur á að opinbera, hver fyrir sig í Hæstarétti að minnsta kosti, þeirra sýn og fordæmingu að teknu tilliti til allra þátta málsins og dæma samkvæmt eigin sannfæringu, en ekki viðteknum venjum eða undangengnum dómum.  

Er hægt að finna "Vísitölu Sársaukans" þegar meta á alvarleika brota og "verðleggja" í dómatilliti skaðann sem hlýst af manndrápi, líkamstjóni, glataðrar æsku, misnotaðri góðvild og jafnvel trausts í nafni Almættisins og fleiri illvirkja sem vaða uppi og ekki sér fyrir endann á? Væri ekki rétt að huga að þessu og forgangsraða refsirammanum samkvæmt því?

Um leið og ásættanleg "Refsivísitala Sársaukans" væri fundin, mætti setja á stofn starfshóp sem ætlað væri að finna "Undanskotsvísitölu Græðginnar". Sá starfshópur myndi eiga mun léttara verkefni fyrir höndum og sennilega getað skilað af sér fyrir hádegi, ef verkefnið lægi fyrir að morgni.

 

Athugasemdir

[halkatla, 20.2.2007 kl. 18:03]

Halldór, ég vil segja þér eitt af því að ég veit ekki hvort þú kemur aftur á bloggið mitt  

sprengidagur var aðaldagur ársins hjá mér þartil ég hætti að borða kjöt. Ég elska saltkjöt útaf lífinu, það er svo gott á bragðið. Ég hef nákvæmlega ekkert útá það að setja að fólk borði það sér til gleði á þessum heiðursdegi en hinsvegar gefst ég aldrei uppá að tala fyrir því sjónarmiði að aðbúnaður svínanna og kindanna og allra hinna húsdýranna verði endurbættur einsog kostur er.... 

það sem ég er að segja er að það er undirmeðvitund mín sem er sennilega að orsaka einhvern biturleika í dag, yfir öllu stjórnleysinu sem ríkir varðandi dráp og svoleiðis, en á meðan hef ég viljandi lagt á mig þvílíkt erfiði til þess að hætta að borða kjöt, eingöngu vegna þess að á meðan ég borðaði það þá gat ég ekki tala um dýravernd... fólk virkilega réðst á mig. Þessvegna reiddist ég þér ómaklega áðan - ég sé eftir því. Þú ert greinilega ekki vitlaus né vondur - en ég fyllist alltaf af heift meðan ég er að skrifa um þetta og rifja upp allt það hroðalega fáránlega sem fólk hefur látið útúr sér við mig vegna þess að mér líður svona og þitt fyrsta komment birtist aðeins of snemma... ég var ennþá í rússi. Viltu semja frið? 

[Halldór Egill Guðnason, 21.2.2007 kl. 08:54]

Kæra Anna Karen.: Alltaf gaman þega tekist er á um menn og málefni. Virði þig, það sem þú ert að gera og það sem þér finnst. Skil vel að hljóti að vera erfitt að "Afkjötast". Á 16 ára dóttur sem tók upp á þessu fyrir 3 árum og hefur verið hreint aðdáunarlega staðföst. Ekki gefið tommu eftir, hvað sem tautar og raular.

Friður sé með okkur ;-)