Einkavinavæðing framundan?

Nei sko, er ekki komið fyrirtæki sem vert er að setja í söluferli og einkavinavæðingu? Það má ekki gerast að eign í eigu ríkisins skili hagnaði! Þetta verður að selja og það hratt. Fjarskiptin, menntunin, heilsugæslan, fiskurinn, orkan og allt það sem þjóðin hefur í sameiningu byggt upp í gegnum tíðina fór fyrir lítið á sínum tíma. Þökk sé einkavinavæðingunni, sem seinna datt í hendur annara en einkavinanna. Nú er okkur sagt að eitthvað sé farið að hjarna yfir Landsbankanum og hann jafnvel farinn að skila hagnaði! Hvernig er þessi hagnaður til kominn og hver á að njóta hans? Það gengur að sjálfsögðu ekki að hinn almenni borgari geri það, eða hvað? Hvert ætli næsta útspil Þistilfjarðarkúvendingsins og Silfurskottunnar verði við þessum tíðindum? Hvað ætli sé búið að ákveða í reykfylltum herbergjum núverandi ríkisstjórnar um framtíð Landsbankans. "Opið, gegnsætt og upplýst söluferli" eða áframhaldandi eign þjóðarinnar á þessari einu stóru innlendu fjármálastofnun, sem með skynsamlegri stjórnun gæti sennilega stoppað aðeins upp í hið mikla Icesave gat. Íslendingar geta aldrei vikist undan því að greiða lágmarksinnistæðuupphæðir Icesave reikningannna, en með sæmilegri stjórn á þessum banka og skynsamlegum útspilum ráðamanna ætti að vera hægt að lágmarka skaðann.

Að lokum smá orðalagsgagnrýni.:

  "Bankinn segir að gengisþróun hafi verið hagfelld á tímabilinu og skipti miklu um arðsemina."

Orðalag þessarar setningar er á þann veg að það setur að manni ugg um að orðagjálfur og útúrsnúningar verði hér eftir notaðir til að rugla okkur í rýminu. "Hagfelld"....Hvur andskotinn er það eiginlega? Bankinn segir gengisþróun hafa verið hagstæða" hefði verið mikið nær að segja. Því fleiri orð eða nýyrði sem notuð eru um einfalda hluti, því grunsamlegri sýnist manni skilaboðin vera og jafnvel verið að ljúga að manni, en nú hef ég sjálfur notað "manni" oftar en góðu hófi gegnir og enda hér með tuðið.

Niðurstaðan er einföld.: Það er skítalykt af þessu öllu saman.  
 

8,3 milljarða hagnaður Landsbanka