Prófkjörafarsi Pírata og VG.

Píratar mælast annar stærsti stjórnmálaflokkur landsins um þessar mundir og hafa haft mikið fylgi, samkvæmt flestum skoðanakönnunum, í langan tíma. Nú ber hinsvegar svo við að ekki er hægt að smala saman sextán hræðum til þáttöku á framboðslista í Norðvesturkjördæmi. Ef til vill ekki að undra, þar sem drottningu flokksins hugnaðist ekki niðurstaða fyrra prófkjörsins og lét ógilda það. Sá sem lenti í efsta sæti í því prófkjöri, tekur skiljanlega ekki þátt í þessu næsta og jafnvel skipper Pírata í kjördæminu ætlar heldur ekki að taka þátt. Hvar ætli allt þetta fylgi, sem Píratar mælast með, sé niðurkomið, ef ekki næst einu sinni að manna fámennan framboðslista í heilu kjördæmi?

 Annað stjórnmálaafl, Vinstri Grænir, hélt einnig nýverið sitt prófkjör á svipuðum slóðum. Þar á bæ var það kjör fellt úr gildi, af forkólfum flokksins, sökum "formgalla" og boðað til annars í staðinn. Forystan á þeim bænum sama merki brennd og hjá Pírötum. Hugnast ekki uppstillingin og því gert ógilt og boðað til annars, eða eins margra og þarf, þar til þóknanleg niðurstaða hefur fengist fyrir forystusveitina. 

 Undarleg tík, pólitíkin. 

 Góðar stundir, með kveðju að sunnan.

Píratar kjósa aftur í NV

Draumórastjórnendur Reykjavíkurborgar.

175-250 milljónir í þrengingu Grensásvegar, 250 milljónir í hjólabrýr í Elliðavogi, sem spara hjólreiðafólki eina og hálfa mínútu, málning á götur sem kosta helling, í tilefni allskonar daga og svo framvegis og svo framvegis. Borgarstjórn Reykjavíkur er samsett draumórafólki, sem svífur í mörg þúsund fetum um loftin blá, án nokkurar tengingar við atvinnurekendur sína. Á leikskóla er matráð gert að metta hundrað munna, fyrir þrjátíu þúsund krónur á dag. Innifalið er morgunhressing, hádegismatur og síðdegiskaffi. Veruleikafyrringin alger. Ekki bætir litlaus og nánast ósýnilegur minnihluti stöðuna. Hvers vegna er ekki hægt að losa sig við svona amlóða, þó kjörtímabilið sé ekki á enda runnið? Hvers vegna er Austurvöllur eða umhverfi ráðhússins ekki virkjað til að mótmæla? Hvað er fólk að hugsa? Það gerist ekkert með undirskriftum. Það sanna dæmin. Vilji fólk breytingar, þarf að heyrast í því. Hvers vegna fjalla fjölmiðlar ekki um vannæringu barna á leikskólum? Eru þeir of uppteknir af fréttatilbúningi? Andskotans vitleysa sem þetta er orðin.

 Góðar stundir, með kveðju að sunnan.

Hitafundur í Ráðhúsinu

Nöturlegt.

Það er varla hægt að koma orðum yfir það sem í þessari frétt kemur fram. Opnu beinbroti, eins og blessað barnið þjáist af, fylgir nánast óbærilegur sársauki, við hina minnstu hreyfingu. Það þekkir tuðarinn vel, enda margbrotinn gegnum tíðina. Að þurfa að bíða dögum saman eftir aðgerð, er óskiljanlegt. Það duga engar afsakanir eða útskýringar. Árið er 2016 og samkvæmt því sem okkur er tjáð, höfum við sjaldan, ef í nokkurn tíma, haft það eins gott. Lilju Líf og foreldrum hennar sendir tuðarinn afsökunarbeiðni, fyrir að hafa ekki staðið sig betur í að velja fólk til landsstjórnarinnar, auk þess að óska þessari prinsessu góðs bata.

Góðar stundir, með kveðju að sunnan.

 

„Óeðlilega langur biðtími“

Norðurljósin mætt!

Nú um miðnættið sáust norðurljósin á himni, hér yfir og sunnan við Reykjafell í Mosfellsbæ. Ekki er tuðaranum kunnugt um hvort þetta er snemmt, eður ei, en ekki man ég eftir því að hafa séð þau í ágúst áður. 

Göðar stundir.

 

Hefur einhver "blaðamaður" spurt starfsmenn?

 Tvöþúsund og sjö fnykinn í blaðamennsku leggur nú um langar leiðir. Á ný taka húðlatir blaðamenn við fréttatilkynningum fyrirtækja og slengja þeim á síður fjölmiðla sinna, án nokkurra athugasemda og án nokkurra spurninga. Ömurleg vinnubrögð og stéttinni til ævarandi skammar. Rífið þið ykkur upp á rassgatinu, blaða og fréttasnápar landsins og segið fréttir, í stað þess að búa þær til, eða það sem öllu verra er, láta mata ykkur eins og ómálga börn, eða bjálfa!

 Góðar stundir, með kveðju að sunnan.

Lyfjaverksmiðjunni lokað á næsta ári

Úrsögnin verður gæfuspor.

 Úrsögn Bretlands, úr evrópusambandinu, verður mikið gæfuspor fyrir efnahag þeirra. Það gæti tekið eitt til þrjú ár fyrir þá að átta aig á því. Eftir situr ömurleg hjörð blýantsnagara og einskisverðra kerfis og möppudýraafætna, sem gert hefur Bretlandi lítið gagn, á undanförnum áratugum. Allt á kostnað skattborgaranna. Bretland er ekki að fara eitt eða neitt, hvað svo sem "kúbunorðursinsáróðursgöbbelsarnir"segja.

 Góðar stundir, með kveðju að sunnan.

Vilja viðskiptasamning við Bretland

Kóngulær.

Mikið er tuðarinn sammála skordýrafræðingnum, um köngulær. Hvað gæti hugsanlega verið dásamlegra en sjá eina renna sér niður af þakskegginu, aðeins örfáa sentimetra frá manni, eða jafnvel á mann, þar sem legið er í algerri slökun á pallinum? Fylgjast með henni spinna vef sinn, upp og niður, út og suður og skapa eitthvert fallegasta prjónaverk náttúrunnar, köngulóarvefinn. Köngulær eru þjóðþrifa skepnur og undursamlega hannaðar. Ef aðeins verkfræðilegi hlutinn er skoðaður, í uppbyggingu einnar köngulóar, kemur svo margt ótrúlegt í ljós, að það tæki of langan tíma að telja upp. Einungis þráðurinn sem köngulóun spinnur er þvílíkt snilldarverk, að enginn ætti að hafa rétt á því að slíta hann, eða deyða framleiðandann. "Óþægindi"nútímamannsins eru aumt yfirklór. Tuðarinn ætti ekki annað eftir en að ráðast á spunameistarann.

 Góðar stundir, með kveðju að sunnan.

„Köngulær eru aldrei plága“

Matvælastofnun og gæludýr.

 Hvers vegna í veröldinni er Matvælastofnun, já Matvælastofnun, ætlað að sjá til þess að meðferð gæludýra sé með lögbundnum hætti? Matvælastofnun? Hvað næst, í þessu kexruglaða embættismannakerfi, sem hægt og örugglega er éta innviði samfélagsins inn að beini, með aðgerðarleysi sínu, skrifræði og óskilvirkni. Endalausir blýantsnagarar, sem haga sér sem smákóngar, til að telja samfélaginu trú um að þeir séu ómissandi, tröllríða kerfinu. Getuleysi, aðgerðarleysi og doði, er það sem blasir við í þessu máli. Greinilega fársjúkur einstaklingur, sem ef til vill óafvitandi þrífst á dýraníði, virðist geta gert það sem honum eða henni sýnist, án þess að til þess skipaðir eftirlitsaðilar geri nokkurn skapaðan hlut. Úrræðaleysi yfirvalda algert og embættismenn ekki starfi sínu vaxnir, eða nenna ekki að sinna skyldum sínum. Eitthvað mikið er að, en þar sem kerfið er orðið sjálfala og nánast ríki í ríki sínu, mun svona málum aðeins fjölga. Þökk sé blýantsnögurunum.

 Góðar stundir, með kveðju að sunnan.

Áður uppvís að dýrasöfnun

"Virðing fyrir leiknum", í boði Borgunar.

Kortafyrirtækin Borgun og Valitor hafa á undanförnum árum verið dæmd til að greiða "sáttagreiðslur" vegna markaðsmisnotkunar og vanvirðingar við sinn eigin leik, upp á milljarða króna. Hræsnin, viðbjóðurinn og óvirðingin sem þessi fyrirtæki telja sig geta hent aftur fyrir sig, með stuðningsyfirlýsingum og fjármokstri í auglýsingar, ásamt einhverjum stuðningi við landslið karla í fótbolta, sem greitt er af kortanotendum, ætti að fá flest hugsandi fólk til að æla. Það ælir hinsvegar enginn og flestir halda áfram að eiga viðskipti við þessi virðingarlausu fyrirtæki, sem víla ekki fyrir sér samráð og undirferli í sínum leik. Þar ríkir enginn heiðarleiki. Þar gengur leikurinn út á undirferli og skepnuskap.

Held ég æli bara einn, en áfram Ísland!!!!! 

 

 Góðar stundir, með kveðju að sunnan. 

Láta hann borga og setja reglur!

 Alveg er það makalaust hve stjórnvöld, ferðaþjónustufyrirtæki og nánast allir, sem koma að ferðamannaiðnaðinum eru gjörsamlega vanbúin fyrir alls kyns uppákomum og lausnum, er varða afvegaleidda ferðamenn. Hingað til lands getur nánast hver sem er komið og gert nánast hvað sem honum sýnist. Týnst, villst eða ratað illa og allir eru tilbúnir að leita. Fara úr vinnu, missa tekjur og fá síðan aðeins klapp á bakið. Þetta er ekki sanngjarnt og kominn tími til að láta rífa í buddur þeirra sem skilja ekki alvarleikann. Upplýsa ferðamenn um að allt vapp utan áður skipulegra ferða geti kostað þá skildinginn sinn.

 Góðar stundir, með kveðju að sunnan.

Göngumaðurinn fundinn