Déskotans, árans ESB!

•  Ætli séu ekki nokkur einustu takmörk fyrir því hvað grútmyglaðir blýantsnagarar og kerfisódámar Evrópusambandsins geta látið sér óviðkomandi? Undarlegur söfnuður, sem hefur hreiðrað um sig þarna suður í Brussel. Sombísöfnuður sem virðist hafa fátt annað að markmiði sínu en gera samborgurum sínum erfitt fyrir og helst kvelja þá pínulítið í leiðinni, sé þess nokkur kostur. Það er ekki einu sinni hægt að fá keypta almennilega ryksugu lengur í Evrópu, því þessi náhirð fann það út að það heyrðist allt of mikið í gömlu góðu sugunum, sem svínvirkuðu, sökum kraftsins sem í þeim bjó. Í dag fást einungis hálfsugur, sem soga varla meir en sem nemur hressilegri snýtu. Nú skal ráðist til atlögu við flugeldana og helst ekki hleypa neinu öðru gegnum nálarauga leiðindapúkanna en hljóðlausu og helst ósýnilegu frussi, sem fáir hafa gaman að. Mikið djöfull hlýtur þetta einskis nýta lið að þurfa að hafa mikið fyrir því, að geta verið svona leiðinlegt. Furðulegur fjandi að á Íslandi skuli heill stjórnmálaflokkur standa opinmynntur af aðdáun yfir þessu viðbjóðslega bjúrókratsskrímsli og vilja þröngva okkur í faðm leiðindapúkanna. Déskotinn bara, best að hætta, áður en ég bora gegnum ipadinn með fingrunum. Manni getur nú sárnað. Nú verður sennilega tekið hressilega til við heimagerðar bombur í framtíðinni, ef fara á eftir þessu rugli. Er ekki annars hægt að sækja um sérstaka undanþágu, sökum sérstakra aðstæðna hér á landi? Það sagði urriðakynlífsfræðingurinn, hér um árið. Var það kannski bara plat og rugl, eins og flest það er snýr að þessu sambandsóbermi....já andskotinn bara, nú er ég hættur.

 Góðar stundir, með kveðju að sunnan.