Mávaskrattar, mannanna sorp, holur, hólar og útsýni.

Búinn að skola af bílnum a.m.k. þrisvar í dag! Fljúgandi, drullandi, rottur í mikilli hæð hafa hér drullað reglulega yfir planið hjá okkur frá því í gærkveldi. Já, mávaskrattar sem sækja enn lengra inn til landsins með ári hverju. Ekki einu sinni hægt að bóna bílinn, hér lengst inn til fjalla, án þess að eiga á hættu að hann sé útdrullaður af þessari bévítans pest, sem þessi lánlausi fugl er, þ.e.a.s mávurinn. Sennilega mannskeppnunni að mestu um að kenna, sem sífellt grefur drulluna úr sjálfri sér lengra inn til landsins, eða þar sem hún heldur að enginn taki eftir.
Hér í Mosfellsbænum hafa bæjarbúar sætt sig við "urðun" sorps í Álfsnesi í allmörg ár. Það hefði sennilega átt að útskýra orðið "URÐUN" betur í því samkomulagi sem sveitarfélögin gerðu sín í milli varðandi losun úrgangs af öllu höfuðborgarsvæðinu, áður en samþykkt var að "URÐA" það allt í Álfsnesi, norðan Mosfellsbæjar.
Urðun telst vera samkvæmt ÖLLUM orðabókum, hola sem síðan er mokað yfir. Urðun í þessu samkomulagi virðist hins vegar vera "STÖFLUN" þar sem síðan er mokað "OFAN Á" allt gumsið.
Nú þegar fnykinn leggur yfir Mosfellsbæ í norðanáttinni, er það sennilega ekki það alversta sem gerst hefur. Það hefur nefnilega komið í ljós að "ÚTSÝNI" hefur minnkað til norðurs og þar sem húseigendur áður sáu Kjalarnesið langt og sætt og Snæfellsjökul í baksýn, blasir í dag við HÓLL eða HRYGGUR!
Sorp er ekki lengur og hefur ekki í langan tíma verið urðað í Álfsnesi að neinu viti. Því hefur verið STAFLAÐ OFAN á jarðveg og síðan mokað yfir herlegheitin, með þeim árangri að pabbi og mamma mín sjá ekki lengur upp á Skaga, þó það útsýni hafi sérstaklega verið tiltekið í söluyfirlitinu á húsinu þeirra, þá er þau keyptu.

Semsagt, án þess að bollaleggja frekar um þetta tiltekna málefni.: Nýr staður óskast fyrir sorp af Höfuðborgarsvæðinu. Áhugasamir viðtakendur sendi tölvupóst á nánast öll sveitarfélög á Höfuðborgarsvæðinu.

Góðar stundir.

RÚV farsi.

Það er gleðiefni að allt fór að lokum vel í þessu tifelli. Það ber að þakka. Það ber hinsvegar að fordæma glórulausan fréttaflutning og fávitahátt fréttastofu RÚV. Sjaldan hefur þessi fjölmiðill sokkið neðar í "fréttaflutningi" ef hægt er að kalla umfjöllunina því nafni. Aulahrollurinn hverfur sennilega ekki fyrr en með haustinu úr manni og skelfilegt til þess að hugsa að ekki sé hægt að neita að greiða fyrir þennan ófögnuð. Sveiattan barasta.

Lent heilu og höldnu

"Sextíuogþriggjaheimilaskjaldborgin"

Mikið er Tuðarinn feginn að loks skuli hafa fundist þau heimili sem standa átti skjaldborg um. Verst að þau skuli ekki vera nema sextíu og þrjú. Frussssss!!!!!!!!!!!!

Góðar stundir.

Laun forsætisráðherra hækkuðu um 217 þúsund

Fáránleg nýlendustefna Breta.

Að Malvinaseyjar skuli tilheyra Bretlandi er svona álíka geggjað og að Vestmannaeyjar tilheyrðu Argentínu. Alger bilun og Íslendingar ættu að styðja Argentínumenn í þessu máli með ráðum og dáðum. Ekki úr vegi að Ólafur Ragnar léti einhver vinsamleg orð falla í hlut Argentínu í þessu máli, úr því hann er nú á ferðinni þarna þessa dagana, hvort eð er. Með því gæti hann svo sannarlega slegið sér enn einn sigurinn, svona rétt áður en hann hættir, eins og hann lofaði í áramótaávarpi sínu.

Argentína leitar til SÞ

Fyrstir með fréttirnar!

Alveg er það magnað hvað mbl er "snöggt" með fréttirnar! Atburðir varla afstaðnir og fréttin komin í loftið. Þvílík gargandi snilldarfréttamennska. Ég hafði satt að segja ekki hugmynd um þetta, frekar en aðrir sem sáu, lásu og vissu af þessu fyrir mörgum dögum.

Ja hérna bara. Íslenskri blaðamannastétt og þó sérstaklega þeirri "mblísku" fer fram með hverjum deginum.

Góðar stundir

17 milljónir söfnuðust

Ólafur Ragnar Grímsson.

Sem ég stóð upp eftir áramótaávarp forseta Íslands, herra Ólafs Ragnars Grímssonar, fann ég til einhverskonar ónotahrolls. Ekki vegna ávarps Ólafs, sem mér þótti eitt hið besta sem sá er þetta ritar hefur hlustað á úr Bessastaðastofu á þessum degi ár hvert, heldur þess að óvissan um það hver flytur næsta ávarp nagaði mig á einhvern undarlegan hátt. Tek ofan hatt minn fyrir Ólafi Ragnari Grímssyni. Áramótaávarp það er rann úr hans ræðuranni í dag, verður seint toppað. Beinskeitt, hárbeitt og hnitmiðað, án nokkurs fagurgala, meira en normalt getur talist. Þakka þér Ólafur fyrir þín störf og hreinskilni. Það er þó nokkuð ágætt að þjóðin viti að minnsta kosti eitt fyrirsjáanlegt atvik á næsta ári, fyrir utan eldgos, ömurlega pólitík og annan ófögnuð. Farvel Ólafur. Þú hefur staðið þig upp og niður, en toppaðir með snilld! Þakka þér forsetuna og reikna með að þú kíkir í kaffi einhvern daginn. Það eru ekki nema sex hús á milli okkar og til að hleypa fjöri í umræðuna má alltaf sækja Jón Baldvin yfir lækinn.
Góðar stundir.

Embættið pólitískt eftirsóknarverðara

"Úr myndasafni"

Það er bæði fróðlegt og ánægjulegt að heyra að hérlend skip skuli fá að veiða þetta magn af þorski í Barentshafi á næsta ári. Það væri líka ánægjulegt, ef fréttamenn mbl gætu nú sett inn mynd með svona frétt, sem sýnir þorskveiðar. Eitthvað hefur myndaveljaranum fatast flugið með þessa mynd úr myndasafninu. Þetta er nefnilega mynd frá rækjuveiðum! Ekki það að svona lagað haldi fyrir manni vöku, eða valdi annari vanlíðan. Sýnir hins vegar hálfgert metnaðarleysi að mínu mati.

Annars allt í gúddí hér til fjalla. Óska öllum landsmönnum nær og fjær árs og friðar og megi næsta ár verða betra en það sem nú er að líða, þó það hafi ef til vill ekki verið neitt sérstaklega verra en einhver önnur. Munið að horfa ekki ofan í skotkökurnar, notið hlífðargleraugu og varist að sprengja hvort annað í tætlur um áramótin.
Góðar stundir.

Um 13.500 tonn af Norðuríshafsþorski

Safarík frétt.

"Harðar deilur um fimm hunda voru til lykta leiddar fyrir Héraðsdómi Reykjavíkur í dag."

Það má með sanni segja að þessi frétt sé bæði greinargóð og vel upp sett. Veitir lesendum mbl góða innsýn í málefnið og framsetning öll til fyrirmyndar. Tuðarinn er margs vísari eftir lesturinn. Takk fyrir mig og góðar stundir.

Gert að afhenda fimm hunda

Er of seint að fara í veiði?

Þessi færsla er neyðaróp til stangveiðimanns í Borgarnesi, sem elskar fluguveiði, skák, köflótta hesta og annað sem kann að gleðja mannsins hjarta. Er stangveiðiárið 2011 virkilega liðið og hvergi hægt að dýfa flugu í sprænu , vatn eða læk lengur á þessu ári? Komment óskast hið snarasta!

Búinn að missa af vagninum?

Á eftir Helga Hóseassyni sem mótmælanda númer eitt á Íslandi, hlýtur Hörður Torfason, sá mæti maður , að teljast verðugur mótmælandi númer tvö. Ólíkt Helga heitnum, sem aldrei lét deigan síga, er hins vegar hætt við að mótmælandi númer tvö hafi þegar misst af svo mörgum vögnum, að varla muni þúsundir manna endurróma áskoranir hans n.k. laugardag. Populistar eru "out of date" þessa dagana og gildir þá engu hvar í flokki eða á mannamótum ætla að vera með einhverskonar "comeback".  Þetta er útvatnað trix og virkar ekki lengur, því miður.

Efna til fundar á Austurvelli