Landafræðiþekking á heimsmælikvarða!

 Landafræðiþekking mbl.is virðist ekki mikil, ef marka má landakortið, sem fylgir þessari frétt. Madagaskar og eyjan Máritíus eru ekki í Vestur-Afríku. Sá sem vinnur svona, ætti að finna sér annan starfsvettvang, hið snarasta. Ritstjórinn ætti ef til vill að gera oggulítið meiri kröfur til starfsmanna sinna.

 Er nema von að manni blöskri vinnubrögðin?!

 Góðar stundir, með kveðju að sunnan.

Fékk 20 ára dóm fyrir þrælahald

Skoðanakannanaruglið hafið!

 Sem kjósandi, fer ég þess hér með á leit við fjölmiðla, að þeir láti mig í friði fyrir skoðanakönnunum. Ég veit að á þessa bón mína verður ekki fallist. Ekki nokkursstaðar. Ég veit það vegna þess, að hérlendir fjölmiðlar eru orðnir svo steingeldir af getuleysi og fréttaþurrð í samfélagi okkar, að þeirra helsta haldreipi fyrir kosningar, eru skoðanakannanir. Með skoðanakönnunum sleppa þeir nefnilega við að vinna vinnuna sína. Geta gripið niður í eitthvað, sem einhver annar hefur gert og gert það að sínu helsta viðfangsefni, að þvæla því fram og til baka fram að kosningum. Með þessu móti sleppa þeir við að "segja" hlutlausar fréttir. Svona eins og þegar jólin byrja í október í IKEA með geitinni.

 Hérlendir fjölmiðlar stimpla sig inn í sveitarstjórnarkosningarnar þetta árið, eins og áður,  sem geitarskrattinn í IKEA. 

 Kosningarnar, eins og jólin, koma óháð fréttamiðlum og þeim sem þar starfa. Það er hinsvegar óþarfi að eyðileggja hvorutveggja fyrir manni.

 Góðar stundir, með kveðju að sunnan.

„Meirihlutinn virðist ætla að halda“

Frétt, eða fréttatilkynning?

 Svo virðist sem mbl.is taki við fréttatilkynningum fyrirtækja til birtingar, en troði þeim sem fréttum á forsíðu sína. Sennilega fylgir dávæn sporsla með, frá viðkomandi fyrirtæki, þekki ég rétt til í hérlendri auglýsingamennsku.

 Þetta eru ömurleg vinnubrögð hjá fjölmiðli, ef ekki er tekið fram að um fréttatilkynningu sé að ræða, frá viðkomandi fyrirtæki. 

 Þetta er ekki frétt, þetta er fréttatilkynning! Lesendur geta með öngvu móti greint á milli lengur, hvað er frétt og hvað ekki. Það hlýtur að vera létt verk hjá viðskiptavaktinni á mbl.is að "vinna" sína "vinnu", þegar öllu er sturtað í fangið á þeim. "Copy paste" og málið er dautt. Fyllt upp í síðuna og allir sáttir, ekki satt? Fnykurinn af þessu heldur manni eins og mér í órafjarlægð frá því að trúa einu eða neinu á mbl.is lengur. Fantaléleg vinnbrögð gott fólk. Fanta, fanta, fantaléleg!

 Góðar stundir, með kveðju að sunnan. 

Steinþór Pálsson ráðinn til KPMG

Flugvöll í Hvassahraun og sundlaug í Fossvogsdal, í boði Krulla kjána.

 Krulli kjáni heldur að hann geti hent sínum vandamálum í nágrannasveitarfélögin, án þess einu sinni að spyrja. 

 Flugvelli í Hafnfirðinga og sundlaug í Kópavogsbúa.

 Hverju næst?

 Fjárhagsvanda borgarinnar, ónýtum götum, viðhaldsskorti, leikskólaskorti, húsnæðisskorti, ísbirni í Húsdýragarðinn, einhverju fyrir róna, eða langri röð af sviknum loforðum, orðaflaumi, bulli, máluðum götum, fuglahúsum, þrengri götum, eða bara jarí jarí?

 Spyr sá sem ekkert veit, frekar en fyrri daginn. Sauður sem maður getur verið, að sjá ekki snilldina í aðgerðarleysi og fíflagangi borgarstjórnarmeirihlutans. Þessar mannvitsbrekkur "loga", sem englar á himnum. 

 Logi virkar hinsvegar ekki án aðstoðarmanneskju og hlýtur því að teljast öryrki, að einhverjum hluta. Ef til vill ekki stórum, en engu að síður heftur á einhvern samfylkingarhátt.

 "Sú mí if jú læk" bloggaði eitt sinn einn albesti bloggarinn.

 Farinn í koju.

 Góðar stundir, með kveðju að sunnan.

 

 

 

Engin afstaða til hönnunarsamkeppni

Sjómanninn upp aftur!

 Ekki getur tuðarinn með nokkru móti séð nokkurn skapaðan hlut út úr þessu pári, sem nú á að mála á þennan veggfjanda. Sennilega betri hugmynd að slengja einni blokkinni enn utan í gaflinn og málið er dautt. Gleyma þessu barasta! Það getur jú varla verið langt í að þétting byggðar í boði Krulla og Holumars, smyrji einhverjum andskotanum að gaflinum, háu eða lágu, hagkvæmu eður ei, fyrir unga eða aldna, eða jafnvel steindauða. Það má jú "jarða" fullt af fólki í kojum utan á öllum þessum fermetrum. Flygildi myndu síðan sjá um blómin og kransana.

 Sjómanninn aftur á vegginn! Ef ekki, gleymið bara þessum skítagafli og öllu pári á hann. Það er hvort eð er búið að taka skóflustungu fyrir báknið suður í Hafnarfirði og þar er öllum andskotans sama um gafla, nema til að hanga undir þeim. Stjáni Júl er búinn að redda þessu. Hver borgar, skiptir engu máli, að því er virðist. Þetta lúkkar jú svo djöfull kúl, fyrir Stjána Júl, á forsíðu.

 Góðar stundir, með kveðju að sunnan.

Nýtt listaverk á Sjávarútvegshúsið

Falleg saga tveggja vina.

 Ótrúlegt hlýtur það að teljast að vinarnýrað passaði við hinn vininn! Gangi þessum höfðingjum allt í haginn, hér eftir sem hingað til. Sönn vinátta verður seint metin til fulls. Reyndar er ekki hægt að meta svo verðmætan fjársjóð.

 Flottir, báðir tveir!

 Góðar stundir, með kveðju að sunnan.

Lífið sjálft er fram undan

Íbúðir í kortunum.

 Borgarstjóraónefnan í Reykjavík hefur með þessari nýjustu kynningu sinni bætt enn og aftur við listann, af öllu því húsnæði sem lofað hefur verið, en ekki verið byggt ennþá. Endalaust bla bla jarí jarí og lítið sem ekkert að gerast. "Hagkvæmar íbúðir"? Hvað þýðir það nákvæmlega? Það er ekkert útskýrt. Samkvæmt reglugerðarugli frá drulluseli í Belgíu kostar formúu að byggja hvern fermeter íbúðarhúsnæðis. Orðagjálfur eins og hagkvæmar íbúðir eða blágrænar niðurfallslausnir hafa enga þýðingu fyrir venjulegt fólk, nema með fylgi hvað verið er að tala um og hvað það kostar.

 Hagkvæmar íbúðir hljóta að vera þær sem reistar eru á ódýrum lóðum og þar sem minnstu er varið í þvælu, sem engin not eru fyrir, eins og t.a.m. 30cm útveggi. 

 "Blágrænar niðurfallslausnir" eru síðan nafnóbermi sem aðeins veruleikafyrrtum rugluhausum dytti í hug. Lausnin er aðallega fólgin í því að allt vatn sem affallskerfi ráða ekki við, sígi á einhvern "blágrænan" hátt út úr ábyrgð þeirra sem skipuleggja eiga fráveitur! Með kynningunni, sem sauðslegir "fjölmiðlar" apa upp, er fólki talin trú um að yfirborðsvatn geti bara svona horfið, hókus pókus ofan í jörðina, ef aðeins er rist renna í landslagið. Til að þetta kerfi gangi upp þarf ótal drenlagnir og fráveitukerfi neðanjarðar, en krulla kjána og holuhjálminum tekst ávallt að skauta fram hjá að nefna það. Vatnið hverfur jú víst bara sísona ef stefna borgarinnar heitir blágræn. Hvert það fer, kemur bara í ljós. Gæti jafnvel endað með kúknum í Frostaskjólinu. "Who knows"?

 Þvílíkir andskotans bjálfar!

 Góðar stundir, með kveðju að sunnan. 

500 hagkvæmar íbúðir í kortunum

Draumur vopnaframleiðendanna.

 Það er skelfilegt að skoða þær myndir, sem fylgja þessari endursögn úr erlendum fjölmiðli, hver svo sem hann er, því augljóst er að hún er ekki unnin af fréttamanni mbl.is frá grunni.

 Rúmlega ígildi íslensku þjóðarinnar hefur verið tortímt í þessu brjálæði og menningarverðmæti og sögulegum mynjum eytt, til óbætanlegs skaða.

 Hinn almenni meðaljón harmar hörmungarnar, þó hann fái ekki nema brotabrot af upplýsingum um ástandið sökum ömurlegra fjölmiðla. Þó finnast menn og konur sem fagna þeim. Kætast við hvert ársfjórðungsuppgjör, yfir gróðanum. Eyða meiru fé í athvörf fyrir heimilislausa ketti en fólk, nema til að drepa það. Drekka sín rándýru vín á bestu veitingastöðum heims og eiga svo mikla peninga, að heil mannsævi dugar ekki til að eyða þeim, þó gjálífi væri stundað alla ævina. Hvaða varmenni ætli það séu nú? Jú, sori mannkyns. Ekki þeir sem taka þátt, ekki þeir sem verða fyrir áföllunum, ekki fórnarlömbin í hildarleikjunum. Hverjir þá? Jú, eigendur vopnaframleiðslufyrirtækjanna sem nú mala gull, sem aldrei fyrr. Fyrirtækja og samsteypa sem nærast á ófriði og hörmungum órekjanlegra og ómerkilegra fórnarlamba. Eftir því sem fórnarlömbunum fjölgar, ófriðurinn dregst á langinn, dofnar umræðan, þökk sé ömurlegum fjölmiðlum og þetta sorapakk auðgast meir og meir, með hverri konu, karli, gamalmenni og síðast en ekki síst barni, sem drepið er með framleiðslu þessara dusilmenna. Með auðæfum sínum hefur þeim tekist í langan tíma að stjórna atburðarás heimsmálanna. Jafnvel getað pantað stríð, ef svo ber undir. Þessi viðbjóður hefur á sínum snærum "lobbyista" á fjölmörgum þjóðþingum "hins frjálsa heims", sem ávallt telur sig þess umkominn að ákvarða örlög þjóða í nafni "frelsis" eða baráttunni gegn hryðjuverkum.

 Það er umhugsunarefni fyrir hvern hugsandi einstakling, hvers vegna þessu skólpi mannlegrar tilveru, hefur tekist þetta í svo langan tíma. 

 Fjölmiðlar eru einnig hluti vandans, því þar á bæ virðist metnaður og sjálfsvirðing horfin. Hvað veldur er erfitt að segja til um. Eignarhald fjölmiðla spilar þar eflaust einhverja rullu, en hversu ömurlegir geta svokallaðir frétta og blaðasnápar orðið, sem telja það upplýsingaflæði að endursegja þvæluna, hver eftir öðrum, án nokkurrar athugunar eða gagnaleitar, frétt?

 Góðar stundir, með sorgarkveðju að sunnan.

Hamfarakennd eyðilegging (myndir)